નિમણૂક / અમદાવાદ કલેક્ટર સંદિપ સાંગલેને સોંપાયો AMC મનપા કમિશનરનો વધારાનો ચાર્જ, ડેપ્યુટી કમિશનરની પણ વરણી થઈ

• અમદાવાદ કલેક્ટરને સોપાયો વધારાનો ચાર્જ
• અમદાવાદ મનપા કમિશનરનો ચાર્જ સંદિપ સાંગલેને સોપાયો
• અમદાવાદ કલેક્ટર તરીકે પણ રહેશે કાર્યકર્ત

અમદાવાદ મનપા કમિશનરની જગ્યા થોડા સમયથી ખાલી પડી છે. ચૂંટણી નજીક આવતા પ્રજા જોગ કામો અને પ્રજા પ્રશ્નો અને તેના સંબંધિત નિર્ણયોની પણ હારમાળા સર્જાઇ છે. ત્યારે હવે અમદાવાદ કલેક્ટર સંદિપ સાંગલેને AMC મનપા કમિશનરનો વધારાનો ચાર્જ આપવામાં આવ્યો છે. આ ચાર્જ દરમિયાન અમદાવાદ જિલ્લાના કલેકટર સાથે સાથે તેઓ મનપા કમિશનરના કામોની પણ આધિકારિક રીતે ધુરા સંભાળશે. 

લોચન શહેરાની બદલી ઈસરોના જોઈન્ટ સેક્રેટરી તરીકે થઈ 
આપને એ પણ જણાવી દઈએ કે  થોડા દિવસ અગાઉ અમદાવાદ મનપા કમિશનર લોચન શહેરાની બદલી કેન્દ્રમાં કરી દેવામાં આવી હતી. તેઓને ઈસરોના જોઈન્ટ સેક્રેટરી તરીકે નિમણૂંક આપવામાં આવતા એએમસી કમિશનરનું પદ ખાલી થયું છે. એક અહેવાલ પ્રમાણે વડોદરાના બંછાનિધિ પાનીને ગમે ત્યારે અમદાવાદ મનપા કમિશનરની ધુરા સંભાળવાનો ચાર્જ સોંપાઈ શકે છે.

AMCના ડેપ્યુટી કમિશનર તરીકે એસ એ પટેલ નિમણુંક 
તો બીજી તરફ અમદાવાદ મ્યુનિસિપલ કોર્પોરેશનના ડેપ્યુટી કમિશનર તરીકે એસ એ પટેલ નિમણુંક કરવામાં આવી છે. નિવૃત IAS અધિકારીની એક વર્ષના કરાર આધારિત DYAMC તરીકે નિમણુંક આપવામાં આવી છે.

સુદીક્ષા રાની ડેપ્યુટેશન પર ગુજરાતમાં ફરજ બજાવશે
ઈન્કમટેક્સના જોઈન્ટ કમિશનર સુદીક્ષા રાની ડેપ્યુટેશન પર ગુજરાતમા ફરજ બજાવશે. ત્રણ વર્ષ માટે ગુજરાત સરકાર અંતર્ગત એડિશનલ કમિશનર સેલ્સ ટેક્સમાં સેવા આપે તેવી રજૂઆત કરવામાં આવી હતી. કેન્દ્રના સંબંધિત વિભાગ દ્વારા મંજૂરી અપાતા સામાન્ય વહીવટ વિભાગે એડિશનલ કમિશનર સેલ્સ ટેક્સ સુદીક્ષા રાની ડેપ્યુટેશન પર મૂકવાની જાહેરાત કરી છે.