અદાણી ગ્રુપે સ્વિસ કંપની હોલ્સિમની બે ભારતીય-લિસ્ટેડ કંપનીઓ એસીસી લિમિટેડ અને અંબુજા સિમેન્ટ્સના શેર માટે 31000 કરોડની ઓપન ઓફર લોન્ચ કરી છે.
અદાણી ગ્રુપે 31000 કરોડની ઓપન ઓફર લોન્ચ કરી
બીજા નંબરની મોટી સિમેન્ટ ઉત્પાદક બનશે અદાણી
ઓપન ઓફર 26 ઓગસ્ટથી 9 સપ્ટેમ્બર સુધી ખુલ્લી રહેશે
અદાણી ગ્રુપે આજે 26 ઓગસ્ટના રોજ 31000 કરોડની ઓપન ઓફર લોન્ચ કરી છે. સ્વિસ કંપની હોલ્સિમની બે ભારતીય-લિસ્ટેડ કંપનીઓ એસીસી લિમિટેડ અને અંબુજા સિમેન્ટ્સના જાહેર શેરહોલ્ડરો પાસેથી વધારાનો 26 ટકા હિસ્સો હસ્તગત કરવા માટે આ ઓફર લાવવામાં આવી છે. આ વર્ષે મે મહિનામાં અદાણી ગ્રુપે જાહેરાત કરી હતી કે તેણે ભારતમાં હોલ્સિમ લિમિટેડના બિઝનેસમાં એક કંટ્રોલિંગ સ્ટોક 10.5 અબજ ડોલરમાં હસ્તગત કરવાનો સોદો કર્યો છે.
અદાણી ગ્રુપ દેશની બીજી સૌથી મોટી સિમેન્ટ ઉત્પાદક
આ ડીલ પૂરી થતાં અદાણી ગ્રુપને દેશનો બીજો સૌથી મોટો સિમેન્ટ ઉત્પાદક બનવાનો રસ્તો સંપૂર્ણપણે સાફ થઈ જશે. ગયા અઠવાડિયે આ ઓપન ઓફર માટે અદાણી ગ્રૂપના પ્રસ્તાવને સિક્યોરિટીઝ એન્ડ એક્સચેન્જ બોર્ડ ઓફ ઇન્ડિયા (સેબી)એ મંજૂરી આપી હતી. કોમ્પિટિશન કમિશન ઓફ ઈન્ડિયાએ અદાણી ગ્રુપના અંબુજા સિમેન્ટ્સ અને એસીસી સિમેન્ટ્સને શનિવારે એટલે કે 13 ઓગસ્ટના રોજ હસ્તગત કરવાના પ્રસ્તાવને મંજૂરી આપી દીધી છે.
ઓપન ઓફર કયા ભાવે આવી?
અદાણી ગ્રુપ અંબુજા સિમેન્ટ્સ લિમિટેડના 26 ટકા શેર ખરીદવા માટે 385 રૂપિયા પ્રતિ શેરની ઓપન ઓફર લઈને આવ્યું છે. જ્યારે એસીસી સિમેન્ટ્સના 26 ટકા શેર ખરીદવા માટે 2300 રૂપિયા પ્રતિ શેરના દરે ઓપન ઓફર પણ લાવવામાં આવી છે. બંને કંપનીઓ માટે ઓપન ઓફર 26 ઓગસ્ટથી 9 સપ્ટેમ્બર સુધી ખુલ્લી રહેશે. અદાણી ગ્રુપે અંબુજા સિમેન્ટ માટે 51.63 કરોડ ઇક્વિટી શેર ખરીદવાનો નિર્ણય કર્યો છે. આ વિસ્તૃત શેર મૂડીનો 26 ટકા હિસ્સો છે, જેની કિંમત 19880 કરોડ જેટલી થઈ શકે છે. એસીસી લિમિટેડ માટે અદાણી ગ્રુપે 4.89 કરોડ શેર ખરીદવાની જાહેરાત કરી છે, જેની કિંમત 11,260 કરોડ રૂપિયા થઈ શકે છે. અદાણી ગ્રુપ અને હોલસિમ વચ્ચે થયેલા કરાર બાદ ઓપન ઓફર લાવવાનો નિર્ણય લેવાયો છે. અદાણી ગ્રુપ હોલ્સિમ ઇન્ડિયાના ભારતના બિઝનેસમાં નિયંત્રક હિસ્સો હસ્તગત કરવાની તૈયારીમાં છે.
સિમેન્ટ બિઝનેસમાં મોટી યોજના
અદાણી ગ્રુપ સિમેન્ટ બિઝનેસમાં મહત્વકાંક્ષી યોજનાઓ બનાવી રહ્યું છે. અદાણી ગ્રુપના ગૌતમ અદાણીને આશા છે કે આગામી વર્ષોમાં ભારતમાં ઈન્ફ્રાસ્ટ્રક્ચર ડેવલપમેન્ટના કામ ઝડપથી થઈ શકે છે અને સિમેન્ટ બિઝનેસમાં તેના પ્રવેશથી અદાણી ગ્રુપનો બિઝનેસ વધારવામાં ઘણી મદદ મળવાની છે. હોલ્સિમ સાથેની ડીલ બાદ અદાણી ગ્રુપ માટે ઓપન ઓફર લાવવી ફરજિયાત હતી, કારણ કે ભારતીય શેરબજારના નિયમો અનુસાર દેશમાં લિસ્ટેડ કોઇપણ કંપનીના 25 ટકા કે તેથી વધુ શેર ખરીદવા માટે ઓપન ઓફર લાવવી ફરજિયાત છે, જેથી કંપનીના લઘુમતી શેરધારકો પોતાના શેર નવા રોકાણકારને અગાઉથી નક્કી કરેલા ભાવે વેચી શકે.