કોવિડ -19 મહામારીની અસરથી ક્રિકેટ જગત થંભી ગયું છે. કોરોનાને કારણે સ્પોર્ટ્સની અનેક મોટી ઈવેન્ટ્સ કેન્સલ થઈ રહી છે ત્યારે આ વાયરસની અસર ખેલાડીઓના અંગત જીવન પર પણ પડી રહી છે. તમને જણાવી દઈએ કે, ઓસ્ટ્રેલિયાના 8 એવા ક્રિકેટર્સ છે જેઓ આ દરમિયાનમાં લગ્ન કરવાના હતા અને આ ઘાતક વાયરસે તેમના સપનાઓ પર પાણી ફેરવી દીધું છે અને તેમને લગ્ન સ્થગિત કરવા પડ્યાં છે.
કોરોનાની અસરથી રમત જગત થંભી ગયું
ક્રિકેટર્સના અંગત જીવન પર પણ કોરોનાની ખરાબ અસર
આ ક્રિકેટર્સના લગ્ન આગળ ઠેલવવા પડ્યાં
WHOએ ચીનથી ફેલાયેલા આ ભયાનક વાયરસને મહામારી જાહેર કર્યું છે અને તેના પ્રકોપને રોકવા માટે ટોક્યો ઓલિમ્પિક્સ, યૂરો કપ, આઈપીએલ, ફીફા અન્ડર -17 મહિલા વર્લ્ડ કપ જેવી મોટી ટૂર્નામેન્ટ મુલતવી રાખવામાં આવી છે. એક રિપોર્ટ મુજબ ઓસ્ટ્રેલિયાના યુવા સ્પિનર એડમ જમ્પા સહિત 8 ક્રિકેટરોએ કોરોના વાયરસના કારણે તેમના લગ્ન સ્થગિત કરવા પડ્યાં છે.
ઓસ્ટ્રેલિયાના પેસર જેક્સન બર્ડ, એન્ડ્ર્યુ ટાઇ, ડાર્સી શોર્ટ, જેસ જોનાસન, કેટલીન ફ્રેટ, એલિસ્ટર મેક્ડર્મોટ અને મિશેલ સ્વેપ્સનને તેમના લગ્ન મુલતવી રાખવાની ફરજ પડી છે. ઓસ્ટ્રેલિયાના મોટાભાગના ક્રિકેટરો ક્રિકેટના શેડ્યૂલને કારણે એપ્રિલમાં લગ્ન કરે છે. આ સમય દરમિયાન ક્રિકેટ સીઝન પણ સમાપ્ત થઈ ગઈ હોય છે.
ઓલરાઉન્ડર ગ્લેન મેક્સવેલ અને પેસર પેટ કમિન્સ પણ કોવિડ-19 ને કારણે મોડા લગ્ન કરી શકે છે. મેક્સવેલની તાજેતરમાં તેની ભારતીય મૂળની ગર્લફ્રેન્ડ વિની રમન સાથે સગાઈ થઈ હતી. કમિન્સે ગયા મહિને સોશિયલ મીડિયા પર તેની સગાઈની જાહેરાત કરી હતી. કમિન્સની મંગેતર બેકી ઇંગ્લેન્ડના બોસ્ટનની છે, જ્યાં કોરોના વાયરસથી પરિસ્થિતિ વધુ ખરાબ થઈ ગઈ છે.
પેસર પેટ કમિન્સ અને મેક્સવેલને આઈપીએલની 13 મી સીઝન માટે કિંગ્સ ઇલેવન પંજાબે હરાજીમાં ખરીદ્યા હતાં. કમિન્સને 15.5 કરોડમાં અને મેક્સવેલને 10.75 કરોડમાં ખરીદ્યો હતો.
કોરોના વાયરસને કારણે વિશ્વભરમાં 1 મિલિયનથી વધુ લોકો ચેપગ્રસ્ત છે અને ઓસ્ટ્રેલિયામાં પણ પરિસ્થતિ ઘણી ખરાબ છે. ઘણા પ્રાંતોમાં લોકડાઉન જાહેર કરવામાં આવ્યું છે અને ત્યાં લોકોને એકઠા કરવા પર પ્રતિબંધ છે. નિયમો અનુસાર, જો કોઈ આવી પરિસ્થિતિમાં લગ્ન કરે છે, તો પછી પાંચથી વધુ લોકો કાર્યક્રમમાં હાજર રહી શકશે નહીં. જેના કારણે ક્રિકેટરો પાસે તેમના લગ્ન મુલતવી રાખવા સિવાય કોઈ વિકલ્પ નથી.