કોરોના વાયરસનો કહેર સતત વધતો જઈ રહ્યો છે. સામાન્ય જનતાથી લઈને બોલિવૂડ સેલેબ્સ અને બધાંને કોરોના પોતાની ઝપટમાં લઈ રહ્યો છે. એક બાજુ અનલોકને કારણે દરેક ઈન્ડસ્ટ્રીમાં કામ ધીરે ધીરે ફરી શરૂ થઈ રહ્યું છે. લોકો કામ કરવા માટે બહાર નીકળી રહ્યા છે. તો આ દરમિયાન કોરોના કેસ પણ ખૂબ સામે આવી રહ્યાં છે. જેમાંથી કેટલાક લોકો જલ્દી સારાં પણ થઈ રહ્યાં છે. ત્યારે હવે બાહુબલી ફેમ એક્ટ્રેસ તમન્ના ભાટિયા પણ કોરોના પોઝિટિવ આવી છે અને તેની હાલત ગંભીર થતાં તેને હૈદરાબાદ સ્થિત એક હોસ્પિટલમાં એડમિટ કરવામાં આવી છે.
તમન્ના ભાટિયા કોરોના પોઝિટિવ આવી
હાલત બગડતાં હૈદરાબાદ સ્થિત હોસ્પિટલમાં ભરતી કરાઈ
તમન્ના થોડા દિવસોથી હૈદરાબાદમાં છે. અહીં તે તેની અપકમિંગ વેબ સીરિઝના શૂટિંગમાં બિઝી છે. એક રિપોર્ટ મુજબ, શૂટિંગ દરમિયાન જ તમન્નામાં કોરોનાના લક્ષણ જોવા મળ્યા હતા. જે બાદ તેનો ટેસ્ટ કરવામાં આવ્યો તો તે પોઝિટિવ આવી છે. સાથે જ તેનો રિપોર્ટ પોઝિટિવ આવતા તેને તરત જ હૈદરાબાદન એક ખાનગી હોસ્પિટલમાં દાખલ કરવામાં આવી છે. જ્યાં તેનો કોવિડ-19નો ઇલાજ ચાલી રહ્યો છે.
તમન્ના અંગેના આવા સમાચાર સામે આવતા તેના ફેન્સ પણ તે જલ્દી સારી થઈ જાય એવી પ્રાર્થના કરી રહ્યાં છે. તમન્નાએ પોતે અત્યાર સુધી સોશિયલ મીડિયા એકાઉન્ટ પર પોતાના ફેન્સને આ અંગે કોઈ જાણકારી આપી નથી. તમને જણાવી દઇએ કે, ગત ઓગષ્ટમાં તમન્નાએ જણાવ્યું હતું કે, તેનાં માતા પિતા કોરોના પોઝિટિવ આવ્યા હતા. પણ તેનો ટેસ્ટ નેગેટિવ આવ્યો હતો.
વર્ક ફ્રન્ટની વાત કરીએ તો તમન્ના આવનારા સમયમાં એક વેબ સીરિઝમાં જોવા મળશે. આ ઉપરાંત તે નવાઝુદ્દીન સિદ્દીકી સાથે 'બોલે ચૂડિયા'માં પણ જોવા મળવાની છે. આ ફિલ્મને નવાઝુદ્દીનનો ભાઇ શમાસ નવાબ ડિરેક્ટ કરી રહ્યો છે.