બોલીવુડની હોનહાર અભિનેત્રી હુમા કુરૈશીએ તાજેતરમાં સુપરસ્ટાર રજનીકાંત વિશે વાત કરતા જણાવ્યું હતું કે સાઉથના સુપરસ્ટાર રજનીકાંત કોઇ પણ નવોદિત કલાકાર માટે પ્રેરણારૃપ છે. એમની સાથે કામ કરતાં ઘણું નવું શીખવા મળે છે. એક અલગ ફીલિંગ આવે છે. હુમાએ રજનીકાંત સાથે કાલા ફિલ્મ કરી છે જેના વિશે છે. હુમાએ કહ્યું 'અફલાતુન અભિનેતા હોવા ઉપરાંત એ અત્યંત સાલસ સ્વભાવના ઇન્સાન છે.
આ ઉપરાંત હુમાએ કહ્યું કે રજનીકાંત બધાની સાથે પ્રેમથી વર્તે છે. મારા જેવા દરેક નવોદિત માટે એ પ્રેરણારૃપ છે. એમની સાથે કામ કરવાનું મારું સ્વપ્ન સાકાર થયું. કાલા ફિલ્મ મારા માટે સદા યાદ રાખવા જેવો અનુભવ બની રહ્યો. રજનીસર સાથે કામ કરતાં પ્રત્યેક પળે મને કંઇક નવું શીખવા મળ્યું. મારા અભિનયમાં સુધારો થયો એવું પણ રજનીસરે કહ્યું' એમ હુમાએ કહ્યું હતું.
જોકે આ ઉપરાંત હુમાએ એણે કાલાના ડાયરેક્ટર રંજિતના પણ ખૂબ વખાણ કર્યા હતા. તેણે કહ્યું કે કલાકારની બેસ્ટ પ્રતિભા કઢાવવાની રંજિત સર પાસે હથોટી છે. તમારામાં રહેલી પ્રતિભાને એ સહેલાઇથી બહાર કાઢી શકે છે. હીરોઇનનો રોલ સ્ટ્રોન્ગ બનાવવાની તેમની ખૂબી નોંધનીય છે. મને એમની પાસે પણ ઘણું નવું શીખવા મળ્યું છે.
તમને જણાવી દઈએ કે આ ફિલ્મમાં હુમા ઝરીના નામની યુવતીનો રોલ કરે છે. મુંબઇમાં તમિળ લોકો પર થતા અત્યાચારોની વાત આ ફિલ્મની કથામાં વણી લેવામાં આવી છે. રજનીકાંતના જમાઇ અભિનેતા ધનુષ આ ફિલ્મના પ્રોડયુસર છે. મળતી માહિતી મુજબ આ ફિલ્મ સાત જૂને રિલીઝ થશે.