દિવાળીના તહેવાર નિમિતે કોઈ અનિચ્છનીય બનાવ ન બને અને તહેવારની ઉજવણી રંગેચગે થાય તે માટે સુરત પોલીસ એલર્ટ છે. તહેવારોમાં ગુનાખોરી અટકાવવા સુરત પોલીસે એક્શન પ્લાન તૈયાર કર્યો છે.
દિવાળીમાં ગુનાખોરી અટકાવવા સુરત પોલીસનો એક્શન પ્લાન તૈયાર
શહેરના દરેક માર્કેટમાં પોલીસ દ્વારા વધારાયું પેટ્રોલિંગ
ક્રાઇમ બ્રાન્ચ, SOG ક્વીક રિએક્શન ટીમ પણ રાખી રહી છે નજર
દિવાળીના તહેવારને આડે હવે એક દિવસ જ બાકી રહ્યો છે. ત્યારે સુરતીઓ શાંતિપૂર્ણ માહોલમાં દિવાળીના તહેવારની ઉજવણી કરી શકે તે માટે પોલીસ દ્વારા એક્શન પ્લાન તૈયાર કરાયો છે. આ અંગે સુરત પોલીસ કમિશનર અજયકુમાર તોમર દ્વારા વિગતવાર માહિતી આપવામાં આવી છે.
શહેરના દરેક માર્કેટમાં પોલીસ પેટ્રોલિંગ વધારી દેવાયું
તેમણે જણાવ્યું કે, દિવાળીના તહેવાર નિમિતે કોઈ અનિચ્છનીય બનાવ ના બને તે માટે તમામ પોલીસ કર્મચારીઓને વિગતવાર આયોજનપૂર્વક કામગીરી કરવાની સૂચના આપવામાં આવી છે. શહેરના દરેક માર્કેટમાં પોલીસ દ્વારા પેટ્રોલિંગ વધારી દેવામાં આવ્યું છે. આ બજારોમાં ચીલઝડપ કે અન્ય ગુનાઓ ન બને તે માટેની તૈયારીઓ પણ પોલીસ દ્વારા કરવામાં આવી છે. સાથે જ સંવેદનશીલ વિસ્તારોમાં પોલીસ દ્વારા પોઈન્ટ પણ ઊભા કરાયા છે.
CCTVથી રાખવામાં આવી રહી છે બાજ નજર
કમિશનર અજયકુમાર તોમરે જણાવ્યું કે, પોલીસ કંટ્રોલ રૂમમાં પણ ખાસ ટીમ બનાવી સીસીટીવી કેમેરાથી બાજ નજર રાખવામાં આવી રહી છે. નાણાકીય સ્થળો પર કંટ્રોલરૂમના CCTVથી પોલીસ દ્વારા નજર રાખવામાં આવી રહી છે. પોલીસની ટીમ બાઇક પેટ્રોલિંગથી લઇ સાયકલ દ્વારા પણ પેટ્રોલિંગ કરશે.
દિવાળીમાં કોઇ અનિચ્છનીય બનાવ નહિ બને તે માટે પોલીસના પ્રયાસ
આ ઉપરાંત હોટેલ, બસ સ્ટેશન અને રેલ્વે સ્ટેશન સહિતના અગત્યના પોઈન્ટ તેમજ વિસ્તારોમાં ચેકિંગ પણ કરવામાં આવી રહ્યું છે. ક્રાઇમ બ્રાન્ચ, SOG ક્વીક રિએક્શન ટીમ પણ રાખી રહી છે નજર. સાથે જ નાઈટ પેટ્રોલિંગ પણ ચુસ્ત કરવામાં આવ્યું છે.