ચાઈનીઝ દોરીને લઈ રાજ્યમાં એક્શન; વડોદરામાં પોલીસે પતંગ બજારમાં તપાસ શરૂ કરી છે જ્યારે ખેડા કઠલાલ બાયપાસ રોડથી ચાઈનીઝ દોરીની હેરાફેરી કરતા 2ની ધરપકડ, સાબરકાંઠા કલેક્ટરે બહાર પાડ્યું જાહેરનામું
વડોદરા પોલીસની પતંગ બજારમાં તપાસ
ખેડા પોલીસને ચાઈનીઝ દોરી બાબતે મોટી સફળતા
સાબરકાંઠા કલેક્ટરે બહાર પાડ્યું જાહેરનામું
ઉતરાયણનો તહેવાર નજીક આવી રહ્યો છે ત્યારે માર્કેટમાં પ્રતિબંધિત ચાઈનીઝ દોરીના ઉપયોગમાં વધારો જોવા મળી રહ્યો છે. ગુજરાતમાં અત્યારસુધી ચાઈનીઝ દોરીના કારણે 4થી વધુ લોકોના મોત થયા છે અને અનેક ઈજાગ્રસ્ત થયા છે. રાજ્યમાં ચાઈનીઝ દોરીને લઈ પોલીસ હરકતમાં આવી છે. વડોદરા, ખેડા અને સાબરકાંઠામાં તંત્ર હરકતમાં આવ્યું છે.
વડોદરા પોલીસની પતંગ બજારમાં તપાસ
વડોદરામાં ચાઈનીઝ દોરીથી 2 લોકોના મૃત્યુ બાદ પોલીસે કાર્યવાહી શરૂ કરી છે. પોલીસે પતંગ બજારમાં તપાસ શરૂ કરી છે. જ્યારે ખેડા પોલીસને ચાઈનીઝ દોરી બાબતે મોટી સફળતા મળી છે. પોલીસે માંડવી ગેટથી ગેંડી ગેટ સુધીની દુકાનોમાં તપાસ શરૂ કરી છે. તમને જણાવી દઈએ કે, વડોદરામાં ચાઈનીઝ દોરીના કારણે 2 દિવસમાં 2 વ્યક્તિએ જીવ ગુમાવ્યો છે
ખેડામાંથી ચાઈનીઝ દોરી પકડાઈ
ખેડામાંથી અલગ-અલગ જગ્યાએથી ચાઈનીઝ દોરી પકડાઈ છે. કપડવંજ પોલીસે કઠલાલ બાયપાસ રોડ પરથી ચાઈનીઝ દોરી ઝડપી પાડી છે. કારમાં ચાઈનીઝ દોરીની હેરાફેરી કરતા 2 લોકોની ધરપકડ કરવામાં આવી છે. 48 નંગ ચાઈનીઝ દોરીના ફીરકા સાથે 2 આરોપી ઝડપાયા છે. કપડવંજ કાલીબસ્તી વિસ્તારમાં ટાઉન પોલીસે દરોડા પાડ્યા છે. 87 હજારની ચાઈનીઝ દોરીના મુદ્દામાલ સાથે 2 વ્યક્તિ સામે ગુનો દાખલ કરવામાં આવ્યો છે. મહેમદાવાદના કાચછાઈ સિમ વિસ્તારમાંથી ચાઈનીઝ દોરી ઝડપાઈ છે જેમાં કુલ 23 ફીરકા જપ્ત કર્યા અને એક વ્યક્તિ સામે ગુનો દાખલ કર્યો છે. મહેમદાવાર શહેરના એક દુકાનમાંથી 60 નંગ ફીરકા સાથે 2 લોકોની ધરપકડ કરાઈ છે.
સાબરકાંઠા કલેક્ટરે બહાર પાડ્યું જાહેરનામું
ગુજરાતમાં અત્યાર સુધી ચાઈનીઝ અનેક લોકોના ભોગ લેવાયા છે તેના સંદર્ભે સાબરકાંઠા જિલ્લા કલેક્ટરે ચાઈનીઝ દોરી, ચાઈનીઝ તુક્કલ પર પ્રતિબંધનો જાહેરનામું બહાર પાડ્યું છે. તેમજ જિલ્લા પોલીસ વડાએ આ મામલે કાયદેસરની કાર્યવાહી કરવાનું નિવેદન આપ્યું છે. સાબરકાંઠા સહિત સમગ્ર ગુજરાત અને દેશમાં નાયલોન સહિત ચાઈનીઝ દોરી ઉપર પ્રતિબંધ મુકાયો છે. ચાઈનીઝ દોરી અત્યાર સુધીમાં કેટલાય પક્ષીઓ સહિત માનવીઓ માટે ઘાતકી બની છે ત્યારે જાહેરનામા અંતર્ગત ચાઈનીઝ દોરીના સંગ્રહ, વેચાણ તેમ જ વપરાશ પર કાયદેસરની કાર્યવાહી કરવામાં આવશે.