મોટો દાવો / શ્રાવણમાં સચિન પાયલટ રાજસ્થાનના મુખ્યમંત્રી બનશે, કોંગ્રેસ નેતાએ ભવિષ્ય ભાખી દીધું, રાજનીતિમાં હલચલ

• રાજસ્થાનમાં મુખ્યમંત્રી બદલાય તેવા એંધાણ
• કોંગ્રેસ નેતા પ્રમોદ આચાર્યે કર્યો મોટો દાવો
• શ્રાવણમાં સચિન પાયલટ બનશે મુખ્યમંત્રી 

રાજસ્થાનમાં ફરી એકવાર નેતૃત્વ પરિવર્તનની અટકળો શરૂ થઇ ગઇ છે. પાયલટ સમર્થક અને કોંગ્રેસ નેતા આચાર્ય પ્રમોદના ટ્વીટથી અટકળો તેજ થઈ ગઈ છે. સચિન પાયલટના સમર્થક મનાતા આચાર્ય પ્રમોદનું એક ટ્વીટ પણ રાજ્યની રાજનીતિમાં ચર્ચાનો વિષય બન્યો છે. 

સચિન પાયલટનો શ્રાવણમાં અભિષેક થશે 
આચાર્ય પ્રમોદે ટ્વિટ કર્યું હતું કે, "ઝેરનું સેવન કરનાર નિલકંઠનો અભિષેક શ્રાવણ મહિનામાં કરવામાં આવે છે. આચાર્ય પ્રમોદે એક ટ્વિટમાં સચિન પાયલટની તુલના માત્ર ઝેર પીનારા નીલકંઠ સાથે જ નથી કરી, પરંતુ શ્રાવણ મહિનામાં અભિષેકની જેમ તેમણે ઈશારામાં કહ્યું છે કે, આગામી કેટલાક મહિનાઓમાં રાજસ્થાનમાં સત્તાની ખુરશીમાં પરિવર્તન આવશે.

આચાર્ય પ્રમોદના ટ્વીટથી ચર્ચાઓનું બજાર ગરમ 
ઉલ્લેખનીય છે કે આચાર્ય પ્રમોદ સચિન પાયલટ સમર્થક નેતા છે કોંગ્રેસની ચિંતન શિબિર દરમિયાન પણ તેમણે સચિન પાયલટને સીએમ ન બનાવવા મુદ્દાને લઈને જાહેરમાં નારાજગી વ્યક્ત કરી હતી. પરંતુ હવે તેમના ટ્વિટથી રાજ્યમાં રાજકીય ચર્ચાઓનું બજાર ફરી ગરમાયું છે.

પાયલટ કેમ્પે ગેહલોતને આપ્યો જવાબ

રાજસ્થાનના સીએમ અશોક ગેહલોતના આ નિવેદનના બે દિવસ બાદ પાયલટ કેમ્પે જડબાતોડ જવાબ આપ્યો છે. પાયલોટ કેમ્પના ધારાસભ્ય ઇન્દ્રજ ગુર્જરે ટ્વિટ કર્યું હતું કે, "એક કોમન મેન ક્યારેય જમીન પર પડતો નથી, ચિંતા તે લોકો માટે છે જે હવામાં છે. આ ટ્વિટને ગેહલોત કેમ્પના જવાબ તરીકે જોવામાં આવી રહ્યું છે. પાયલટના ખૂબ જ નજીકના મનાતા વિરાટ નગરના ધારાસભ્ય ઇન્દ્રજ ગુર્જરે સીધા સીએમ ગેહલોતનું નામ નથી લીધું, પરંતુ આ ટ્વીટને ગેહલોતના જવાબ તરીકે જોવામાં આવી રહ્યું છે. સીએમ ગેહલોતે શનિવારે કહ્યું હતું કે, કેન્દ્રીય પ્રધાનો ગજેન્દ્રસિંહ શેખાવત અને સચિન પાયલોટ સરકારને નીચે લાવવામાં સામેલ છે. ગેહલોત બાદ સીએમના ખૂબ જ નજીકના મંત્રી શાંતિ ધારીવાલે પણ સચિન પાયલટ પર શાબ્દિક હુમલો કર્યો હતો. બે દિવસની ચુપકીદી બાદ પાયલટ છાવણીએ ગેહલોત છાવણીને જવાબ આપ્યો છે.

રાજસ્થાનમાં સીએમની ખુરશીને લઈને ખેંચતાણ 
સોનિયા ગાંધી અને રાહુલ ગાંધીને ઇડી દ્વારા સમન્સ પાઠવવાના વિરોધમાં કોંગ્રેસના કાર્યકરો એક થયા છે.  દિલ્હીમાં જે રીતે પાયલટે રાહુલ ગાંધીના સમર્થનમાં કમાન સંભાળી છે અને રાહુલ ગાંધીએ પાયલટની ધીરજના વખાણ કર્યા છે. ગેહલોત છાવણી આ વાતથી અસહજતા અનુભવી રહી છે. કદાચ આ જ કારણ છે કે સચિન પાયલટ રાજસ્થાનના રાજકારણના કેન્દ્રમાં આવી ગયા છે. ગેહલોત સતત કેમ્પ પાયલટ પર હુમલો કરી રહ્યા છે. જો કે સચિન પાયલટે કોઈ પ્રતિક્રિયા આપી નથી અને તેને બદલે ધૈર્યથી આવનાર સમયની પ્રતિક્ષા કરી રહ્યાં છે.