ભરૂચ, અમદાવાદ બાદ હવે વડોદરામાં બાળકનું અપહરણ કરતી ગેંગના વહેમમાં નિર્દોષ યુવક અને મહિલા પર ટોળાએ જીવલેણ હુમલો કરતા પોલીસે કાર્યવાહી હાથ ધરી છે.
વડોદરા શહેરના કિશનવાડી વિસ્તારની ઘટના
બાળક ચોરીનો આરોપ સાથે મોડી રાત્રીએ ટોળાએ કર્યો હુમલો
માર મારતા યુવક-યુવતી થયા બેભાન
વડોદરા શહેરમાં હાલ બાળક ઉઠાવતી ગેંગ સક્રિય થઈ છે, સોશિયલ મીડિયા પર એવા અનેક વીડિયો વાયરલ થઈ રહ્યા છે. જેમાં આ ગેંગ દ્વારા બાળકોની ઉઠાંતરી કરવામાં આવે છે. ક્યાંક રેલવે સ્ટેશન પરથી તો ક્યાંક સ્કૂલ નજીકથી બાળકોની ઉઠાંતરી કરાતી હોવાનું સામે આવી રહ્યું છે. એવા અનેક શંકાસ્પદ વ્યક્તિઓ હાલ શહેરમાં ફરતા હોય છે. પણ માત્ર શંકા અને વહેમનાં આધારે લોકો પણ હિંસક થતા જોવા મળી રહ્યા છે. લોકો એવા શંકાસ્પદ લોકોને પોલીસને સોંપવા કરતા પોતે કાયદો હાથમાં લઈ હિંસક બની રહ્યા છે. જે બાબત દુખદ છે. આવીજ એક ઘટનાં વડોદરાના કિશનવાડી વિસ્તારમાં બની હતી, જેમાં બાળકચોરીનો આરોપ લગાવી લોકોએ એક યુવક અને યુવતીને મરણતોલ માર માર્યો હતો.
પોલીસની હાજરીમાં યુવક-મહિલાને માર્યો માર
ગઈકાલે રાત્રે વડોદરા શહેરના કિશનવાડી વિસ્તારમાં યુવક અને યુવતી પર ટોળાએ જીવલેણ હુમલો કર્યો હતો. બાળકચોરીનો આરોપ મૂકીને બંનેને લોકોએ મરણતોલ માર માર્યો હતો. આ ઉપરાંત બેકાબૂ બનેલા ટોળાએ બાઈકને પણ નુકસાન પહોંચાડ્યું હતું. બેકાબૂ બનેલા ટોળાએ પોલીસની હાજરીમાં યુવક-યુવતીને એટલી હદે માર માર્યે કે બંને રોડ પર બેભાન થઈ ગયા. બાપોદ પોલીસે મહામુસીબતે બંને ઇજાગ્રસ્તને હોસ્પિટલ ખસેડ્યા હતા. હાલ આ મામલે પોલીસે વધુ તપાસ હાથ ધરી છે.
બાળકચોરની આશંકાએ એક વ્યક્તિને માર્યો ઢોર માર
અમદાવાદમાં પણ આવો બનાવ સામે આવ્યો હતો, દાણીલીમડામાં બાળક ચોરની આશંકાએ લોકોએ એક વ્યક્તિને ઢોર માર માર્યો હતો. જેમાં શંકાસ્પદ વ્યક્તિને માર મારાતો હોવાનો વીડિયો પણ વાયરલ થયો હતો. સ્થાનિક લોકોએ યુવકને માર મારીને પોલીસને જાણ કરી હતી. જેને લઇને દાણીલીમડા પોલીસે આ મુદ્દે તપાસ શરૂ કરી હતી.
ભરૂચ પોલીસે 29 લોકો સામે દાખલ કર્યો હતો ગુનો
મહત્વનું છે કે, ભરૂચમાં બાળકોનું અપહરણ કરતી ગેંગના વહેમમાં નિર્દોષ લોકો પર હુમલાની ઘટના પ્રકાશમાં આવતા પોલીસ દ્વારા કડક વલણ અપનાવવામાં આવ્યું હતું. પોલીસે નિર્દોષોને માર મારવાના આરોપસર 2 અલગ અલગ ગુના દાખલ કરી કાયદેસરની કાર્યવાહી હાથ ધરી હતી. પોલીસે બાળકો ઉઠાવી જવાની શંકાએ નિર્દોષોને માર મારનાર 29 લોકો સામે ગુનો દાખલ કર્યો હતા. બે બનાવમાં 2 અલગ અલગ ગુના દાખલ કરવામાં આવ્યા હતા.