રાજકોટ ક્રાઇમ બ્રાંચ અને માલવિયાનગર પોલીસે આરોપીને ઝડપી લીધો
પોલીસે આરોપીને ઝડપી વધુ પુછપરછ હાથ ધરી
તાજેતરમાં રાજકોટ ખાતે ખોડલધામના પ્રમુખ નરેશ પટેલના વેવાઈના બંગલાંમાં હત્યાનો બનાવ પ્રકાસમાં આવ્યો હતો. પ્રવીણભાઈ પટેલના અમીન માર્ગ પર વિધાકુંજ હાઉસિંગ સોસાયટી–૧માં આવેલા બંગલામાં ઘૂસેલા આરોપીએ બંગલાના કેરટેકર વિષ્ણુભાઈ ચકુભાઈ કુચલા (ઉ.વ.૬૮)ને મોતને ઘાટ ઉતારી દીધા હતા.આ અંગેના CCTV ફૂટેજ સામે આવ્યા બાદ પોલીસે CCTV આધારે અલગ અલગ ટીમો બનાવી તપાસ હાથ ધરી હતી. આ પ્રકરણમાં આરોપીને પકડી પાડવામાં પોલીસને સફળતા સાંપડી છે અને હત્યાના આરોપી રાજસ્થાની શખ્સને પોલીસે સકંજામાં લીધો છે. રાજકોટ ક્રાઇમ બ્રાંચ અને માલવિયાનગર પોલીસે સહિયારું ઓપરેશન હાથ ધરી આરોપીને ઝડપી લીધો છે.
મળતી પ્રાથમિક માહિતી મુજબ ખાલી મકાનમાં રાજસ્થાનના ઉદયપુરનો આરોપી ચોરી કરવાના ઇરાદે ઘૂસ્યો હતો. જે અંગે જાણ થતાં વિષ્ણુભાઈ કુચલાએ આરોપીને પડકાર્યો હતો. જેથી આરોપીએ વિષ્ણુભાઈ પર તિક્ષ્ણ હથિયાર વડે હુમલો કરી ઢીમ ઢાળી દીધુ હોવાનું પ્રાથમિક વિગતમાં સામે આવ્યું છે.
શુ હતી સમગ્ર ઘટના?
ખોડલધામના ચેરમેન નરેશભાઈ પટેલના વેવાઈ પ્રવિણભાઈ વિઠ્ઠલભાઈ પટેલ છેલ્લા ચારેક વર્ષથી પરિવારજનો સાથે વડોદરા સ્થાયી થયા છે અને તેમના રાજકોટ ખાતેના બંગલાની છેલ્લા ૩૭ વર્ષથી યોગીનગરમાં રહેતા વિષ્ણુભાઈ કુચલા દેખભાળ રાખતા હતા. આ દરમિયાન થોડા સમય અગાઉ રાત્રિના સમયગાળા દરમિયાન વિષ્ણુભાઈ કુચલા નામના વૃદ્ધની તિક્ષ્ણ હથિયારના ઘા ઝીંકી હત્યા કરેલી હાલતમાં મૃતદેહ મળ્યો હતો અને વૃધ્ધના મોંમા કપડાનો ડૂમો દીધો હોવાનું પણ સામે આવ્યું હતું. બનાવના પગલે રાજકોટ શહેર પોલીસના ડીસીપી ક્રાઈમ પી.એન.ગોહિલ, ડીસીપી ઝોન–૨ સુધીર દેસાઈ, ક્રાઈમ બ્રાંચ પીઆ, જે.વી.ધોળા, વાય.બી.જાડેજા, માલવિયાનગર પીઆઈ કે.એન.ભુક્કણ તેમજ અન્ય કાફલો દોડી ગયો હતો.
હત્યા બાદ આરોપી કોટેચા ચોક સુધી ચાલતો ગયો હતો
પોલીસ તપાસમા સીસીટીવી ફટેજ નિહાળતા એક શખ્સ ડિસમીસ સાથે બંગલોમાં આવ્યો હોવાનું જાણવા મળ્યું હતું. ત્યારબાદ પંદરેક મિનિટના સમયગાળામાં બંગલોની પાછળની દીવાલથી નીકળતો દેખાયો હતો.આથી ડીસમીસ વડે વૃધ્ધની હત્યા નિપજાવવામાં આવી હોવાની શંકા વ્યક્ત કરાઇ હતી. બનાવ સંદર્ભે પોલીસે વધુ સીસીટીવી ફટેજ ચેક કરવા તપાસ હાથ ધરી હતી જેમાં હત્યા બાદ આરોપી કોટેચા ચોક સુધી ચાલતો ગયો હોવાનું સીસીટીવીમાં સામે આવ્યું હતું. ત્યારબાદ કોટેચા ચોકથી ઓટોરિક્ષામાં બેસીને આરોપી ફરાર થઇ ગયો હોવાનું સામે આવ્યું હતું. આથી પોલીસે રિક્ષા ચાલકની પણ પૂછપરછ હાથ ધરી હતી.