સુરતના સચિન GIDCમાં નવરાત્રીના સમયે 4 વર્ષની બાળકીને સંતરા ખવડાવવાની લાલચે આરોપીએ ઝાડી ઝાંખરામાં લઇ જઇ દુષ્કર્મ આચર્યું હતું. ત્યારે હવે સુરતની પોક્સો કોર્ટે આરોપીને અંતિમ શ્વાસ સુધીની આકરી સજા ફટકારી છે.
સુરતની 4 વર્ષની બાળકી સાથે દુષ્કર્મ મામલો
કોર્ટે 5 દિવસમાં જ ટ્રાયલ પૂર્ણ કરી અંતિમ શ્વાસ સુધી કેદની સજા ફટકારી
કોર્ટમાં રાત્રે 12 વાગ્યા સુધી હિયરિંગ થયું હતું
સચીન જીઆઇડીસી વિસ્તારમાં માસુમ 4 વર્ષની બાળકી પર દુષ્કર્મ ગુજારનાર નરાધમ 39 વર્ષીય આરોપી અજય નિશાદની પોલીસ દ્વારા ધરપકડ કરી જેલના સળીયા પાછળ ધકેલી દેવામાં આવ્યો હતો. પોલીસે આરોપીના સુરત કોર્ટમાં રજૂ કરી રિમાન્ડ મેળવ્યા હતા. આરોપીને કડકથી કડક સજા થાય તે માટે પોલીસ તરફથી વધુથી વધુ પુરાવાઓ એકત્ર કરી ઝડપથી ચાર્જશીટ ફાઇલ કરાઈ હતી. ત્યારે હવે સેશન્સ કોર્ટે આરોપી અજય નિશાદને ફટકારી આજીવન કેદની સજા ફટકારી છે. માત્ર 5 દિવસની સુનાવણી દરમિયાન કોર્ટે ઐતિહાસિક ચુકાદો આપ્યો છે.
મહત્વનું છે કે, 12 ઓક્ટોબર 2021ના રોજ 4 વર્ષની બાળકી સાથે આરોપીએ દુષ્કર્મ આચર્યુ હતું. ગણતરીની કલાકોમાં પોલીસે આરોપી અજય નિશાદની ધરપકડ કરી હતી. કોર્ટમાં મોબાઇલમાં બાળકીએ આરોપીને ઓળખી બતાવ્યો. એક સમય આ કેસ માટે સેશન્સ કોર્ટે મોડી રાત સુધી કોર્ટની કાર્યવાહી ચાલું રાખી હતી. સુરતની પોક્સો કોર્ટે કેસને પ્રાયોરિટી આપી છે.
29 દિવસમાં જ ચુકાદો આવી ગયોઃ હર્ષ સંઘવી
હર્ષ સંઘવીએ આ અંગે ટ્વિટ કરતા કહ્યું કે, સુરતના સચિન GIDCમાં 4 વર્ષની બાળકીનો બળાત્કારનો મામલે સુરતની સેશંસ કોર્ટે ઇતિહાસ રચ્યો છે. 29 દિવસમાં જ ચુકાદો આવી ગયો છે. 10 દિવસમાં જ ચાર્જશીટ ફાઈલ કરાઈ હતી. આરોપીને જીવનના અંતિમ શ્વાસ સુધીની સજા અને એક લાખ રુપિયાનો દંડ.
કોર્ટમાં રાત્રે 12 વાગ્યા સુધી હિયરિંગ થયું હતુંઃ હર્ષ સંઘવી
હર્ષ સંઘવીએ ટ્વિટ કરીને કહ્યું કે, પીડિત પરિવારને ન્યાય અપાવવામાં માટે કોર્ટમાં રાત્રે 12 વાગ્યા સુધી હિયરિંગ થયું હતું. ગુજરાત સરકાર ઝડપી ન્યાય માટે પ્રતિબદ્ધ છે. પીડિત પરિવારને ઝડપી ન્યાય મળે. ગુનેગારોમાં ડર પૈદા થાય. સમાજમા એક કડક દાખલો બેસે. આ હેતુથી આજે ગુજરાતમાં ઐતિહાસિક સમયમાં ચુકાદો આવ્યો છે.