વરસાદી માહોલ / સૌરાષ્ટ્ર અને દક્ષિણ ગુજરાતમાં વરસાદની જમાવટ, ભરૂચ અને અમરેલીમાં ધોધમાર ખાબક્યો

સુરત સહિત સમગ્ર દક્ષિણ ગુજરાતમાં આજે વહેલી સવારથી વરસાદી માહોલ જોવા મળ્યો છે. કાળા ડિબાગ વાદળો સાથે વાતાવરણ વરસાદીમય બન્યું છે. બપોરના સમયે સુરતના જુદા જુદા વિસ્તારમાં વરસાદ શરૂ થયો હતો. શહેરમાં છેલ્લા ઘણા સમયથી ભારે બફારો વર્તાઈ રહ્યો હતો. શહેરમાં બફારા વચ્ચે બપોરના સમય અચાનક ધોધમાર વરસાદ વરસતા શહેરમાં ઠંડક પ્રસરે છે.

બોટાદના ગ્રામ્ય વિસ્તારોમાં પણ વરસાદી માહોલ

બોટાદ શહેરમાં વરસાદી માહોલ જામ્યો છે. શહેરમાં ભારે પવન સાથે ધોધમાર વરસાદ પડ્યો હતો. બોટાદનાં ગ્રામ્ય વિસ્તારોમાં પણ વરસાદી માહોલ છવાયો હતો. વાવણી લાયક વરસાદથી ખેડૂતોએ રાહતનો શ્વાસ લીધો હતો. વરસાદનાં આગમનને લઈ બોટાદનાં શહેરીજનોને ગરમીથી રાહત મળી હતી.

ભરૂચમાં વરસાદનું આગમન

હવામાન વિભાગની આગાહીને લઈને ભરૂચમાં વરસાદનું આગમન થયું છે. શહેરમાં છેલ્લા બે દિવસથી ભારે ઉકળાટ બાદ આજે મેઘરાજાએ પધરામણી કરી છે. શહેરમાં ધોધમાર વરસાદ વરસતા લોકોને ગરમી અને બફારાથી રાહત મળી છે.

ધોધમાર વરસાદથી રસ્તાઓ પર પાણી ભરાયા

અમરેલીમાં ધોધમાર વરસાદ પડ્યો હતો. અમરેલી જીલ્લામાં બીજા દિવસે પણ ધોધમાર વરસાદ પડ્યો હતો. ખાંભા, બાબરા બાદ રાજુલા પંથકમાં વરસાદી માહોલ જામ્યો હતો. ડુંગર, કુંભારીયા, દેવકા, માંડરડી સહિતનાં ગામોમાં ધોધમાર વરસાદ પડ્યો હતો. ધોધમાર વરસાદથી રસ્તાઓ પર પાણી ભરાયા હતા.

સાયલા તાલુકાના અનેક ગામોમાં પણ વરસાદ

સુરેન્દ્રનગરનાં સાયલા તાલુકામાં ધોધમાર વરસાદ પડ્યો હતો. ગરમી અને બફારા બાદ મેઘરાજાની ધમાકેદાર એન્ટ્રી થવા પામી હતી. સાયલા તાલુકાનાં અનેક ગામોમાં પણ વરસાદી માહોલ છવાયો હતો.