ઉચાપત / એક મહિના પહેલા જોડાયેલો એકાઉન્ટન્ટ ૧૪.૮૭ લાખની ઉચાપત કરી રફુચક્કર

• ૧૪.૮૭  લાખ રૂપિયા ડેબિટ થયાનો મેસેજ આવ્યો
• CCTVમાં ખુલી ચોરી
• બેન્કની ડીટેઇલ ચેક કરતા ખુલાસો થયો

આંબાવાડીમાં રહેતા અને નારોલમાં કોઠારી પેપર કોર્પોરેશન નામની ઓફિસ ધરાવતા નવલભાઇ કોઠારીએ નારોલ પોલીસ સ્ટેશનમાં તેમના કંપનીમાં કામ કરતા કર્મચારી વિરુદ્ધ ૧૪.૮૭ લાખ રૂપિયાની ઉચાપતની ફરિયાદ કરી છે. 

૧૪.૮૭  લાખ રૂપિયા ડેબિટ થયાનો મેસેજ આવ્યો
૨૫ ઓક્ટો.ના રોજ નવલભાઇના મોબાઇલ પર કાલુપુર કોમર્શિયલ બેન્કના ખાતા માથી ૧૪.૮૭  લાખ રૂપિયા ડેબિટ થયાનો મેસેજ આવ્યો હતો. નવલભાઇએ ઓફિસ જઇને મેનેજર ચંદનભાઇને પૂછ્યું તો તેમણે કોઇને ચેક આપ્યો નહીં હોવાનું જણાવ્યુ હતું. બેન્કમાં જઇને તપાસ કરતાં જાણવા મળ્યુ હતું કે કોઇએ ખોટી સહી કરીને રૂપિયા આરટીજીએ મારફતે ટ્રાન્સફર કરાવી લીધા છે.

CCTVમાં ખુલી ચોરી
નવલભાઇ અને તેમના પુત્રએ બેન્કના સીસીટીવી કેમેરાના ફૂટેજ જોતાં સામે આવ્યું હતું કે એક મહિનાથી તેમની કંપનીમાં આસિસ્ટટ એકાઉન્ટન્ટ તરીકે કામ કરતા પ્રકાશ પારેખે રૂપિયાની હેરફેર કરી છે. નવલભાઇએ ઓફિસમાં આવીને પ્રકાશ પારેખનો બાયોડેટા જોવા માટે ફાઇલો ચેક કરી તો બાયોડેટા પણ ગાયબ હતો અને કેટલાક ચેકો પણ ગુમ હતા. 

બેન્કની ડીટેઇલ ચેક કરતા ખુલાસો થયો
બેન્કની ડીટેઇલ ચેક કરતા જાણવા મળ્યું કે જે બેન્કમાં રૂપિયા ટ્રાન્સફર થયા છે તે વડોદરાના જયેશ હિતેશભાઇ જૈનનું છે અને તે બીજું કોઇ નહીં પણ પ્રકાશ પારેખ છે. નવલભાઇએ બેન્કધારકનો ફોટોગ્રાફ્સ જોયો હતો તે પ્રકાશ પારેખનો હતો. જેથી ૧૪.૮૭  લાખની ઉચાપત કરનાર પ્રકાશ પારેખ છે કે જયેશ જૈન નારોલ પોલીસે નવલભાઇની ફરિયાદના આધારે તપાસ શરૂ કરી છે.