જો તમે ટ્રેનમાં મુસાફરી કરતા હોય તો જરા ચેતવાની જરૂર છે. છેલ્લા કેટલાક દિવસમાં ગુજરાતમાંથી જ ટ્રેનમાં મુસાફરી કરતા સમયે દુર્ઘટનાના અનેક બનાવ સામે આવ્યા છે. જેમાં વ્યક્તિ સામાન્ય ચૂકના કારણે જીવ જોખમમાં મુકી દે છે.
પ્રથમ ઘટના સુરત(Surat)ના સચિન વિસ્તારની છે. જ્યાં ચાલુ ટ્રે્ને ઉતરવાનો અખતરો એક યુવાનને ભારે પડ્યો છે. ચાલુ ટ્રેને યુવક નીચે ઉતરવા જતાં રેલવે ટ્રેક પર પટકાયો હતો. જોકે આ ઘટનામાં યુવકનો ચમત્કારિક બચાવો થયો હતો. તો આ ઘટના કોઈ વ્યક્તિએ પોતાના મોબાઈલમાં કેદ કરી હતી. જેમાં એક યુવક ચાલુ ટ્રેને નીચે ઉતરી જાય છે. જેમાં યુવકને સામાન્ય ઈજા પહોંચે છે. બાદમાં તે ત્યાંથી ઉભો થઈને ચાલતી પકડે છે. પણ અહીં વીટીવી ન્યૂઝ લોકોને સલાહ આપે છે કે આ રીતે પોતાનો જીવ જોખમમાં ન મુકો. તમારા ઘરે તમારા પરિવારજનો રાહ જોતા હશે.
તો ગઈકાલે અમદાવાદ(Ahmedabad) કાલુપુર રેલવે સ્ટેશન પર પણ ચાલુ ટ્રેને ચઢવા જતાં મહિલાનો પગ લપસ્યો હતો. મહિલા ટ્રેન અને પ્લેટફોર્મ વચ્ચે ફસાઈ ગઈ હતી. જોકે ત્યાં હાજર મુસાફરો અને પોલીસકર્મીઓએ મહિલાનો જીવ બચાવ્યો હતો.
તો બીજી તરફ બે દિવસ પૂર્વે ભરૂચ(Bharuch)માં પણ ચાલુ ટ્રેનમાંથી પડી જતાં એક યુવકનું મોત નિપજ્યું હતું. યુવકનો હાથ છૂટી જતાં તે ટ્રેનથી નીચે પટકાયો હતો. જોકે અહીં વાત તમારી સુરક્ષાની છે. આ રીતે જીવ જોખમમાં ન મુકો.
અત્રે ઉલ્લેખનીય છે કે, શનિવારે સુરતમાં બીજી દુર્ઘટના પણ બની હતી. જેમાં ઉધના ખાડી પર ટ્રેનની અડફેટે પરિવારના 6 લોકો આવી જતા 2ના મોત નિપજ્યા છે જ્યારે એકને ગંભીર ઇજા પહોંચી છે. આ ઘટના ઉધના અને સુરત રેલવે સ્ટેશન વચ્ચે બની હતી. રાજસ્થાની પરિવારના 6 સભ્યો ભૂલથી બીજી ટ્રેનમાં બેસી ગયા હતા. ત્યારે તમામ લોકો સુરત સ્ટેશન તરફ રેલવે ટ્રેક પર ચાલીને જઇ રહ્યા હતા. આ જ દરમિયાન ઉધના ખાડી બ્રિજ પર ટ્રેન આવી જતા 6 સભ્યો અડફેટે આવ્યા જેમાં 2ના મોત નિપજ્યા છે જ્યારે એક ગંભીર હાલતમાં છે.