અકસ્માત / વેરાવળ-તાલાલા રોડ બન્યો રક્તરંજિત, બેકાબુ કારની અડફેટે દંપતિના કમકમાટીભર્યા મોત

• વેરાવળ તાલાલા રોડ પર ગમખ્વાર અકસ્માત
• કાર ચાલકે મોપેડને હડફેટે લીધી
• મોપેડમાં સવાર દંપતિનું ઘટના સ્થળે મોત

 ગીરસોમનાથ જિલ્લામાં અકસ્માતની ગોઝારી ઘટના સામે આવતા ચકચાર મચી જવા પામી છે. જેમાં વેરાવળ-તાલાલા રોડ પર કાર ચાલક અને મોપેડ વચ્ચે ધડાકાભેર અકસ્માત સર્જાયો હતો. બેફામ સ્પીડે આવતા કાર ચાલકે સ્ટેરિંગ પરનો કાબૂ ગુમાવી દેતા અકસ્માત સર્જાયો હતો. આ કરુણ ઘટનામાં મોપેડમાં સવાર દંપતિનું ઘટનાસ્થળે જ કમકમાટીભર્યું મોત નીપજ્યું હતું. 

 
મૃતક દંપતી વેરાવળના હોવાની પ્રાથમિક વિગત
જેમાં મૃતક દંપતી વેરાવળના હોવાની પ્રાથમિક વિગતો પ્રકાસમાં આવી  છે. આ અંગે વાયુ વેગે સમાચાર પ્રસરી જતા મૃતકના પરીવારજનોમાં અરેરાટી મચી જવા પામી છે. સામે બાજુ અકસ્માત અંગે જાણ થતા સ્થાનિક પોલીસ કાફલો પણ ઘટના સ્થળે દોડી ગયો હતો અને મૃતકને પોસ્ટમોર્ટમ માટે ખસેડવા સહીતની કાર્યવાહી હાથ ધરી હતી.
 

અગાઉ  સાણંદ જીઆઈડીસી નજીક ચાર લોકોના થયા હતા મોત
થોડા દિવસ અગાઉ અમદાવાદ નજીકના સાણંદ જીઆઈડીસી વિસ્તારનો માર્ગ રક્તરંજિત બન્યો હતો જેમાં બંધ પડેલ ટ્રક પાછળ તુફાન કાર ટકરાતા ભયંકર અકસ્માત સર્જાયો હતો. ટ્રોઈકા ફાર્મા કંપનીના સ્ટાફને લઇ તુફાન કાર  જતી હતી આ વેળાએ વાનના ચાલકે સ્ટેરિંગ પરનો કાબુ ગુમાવી દેતા કાર બંધ પડેલ ટ્રક પાછળ ઘૂસી ગઇ હતી. જે અકસ્માતમાં ચાર લોકોના કમકમાટીભર્યા મોત નિપજ્યાં હતા. જ્યાંરે અન્ય ચારથી વધુ લોકોને ઇજા પહોંચી હતી.