અકસ્માત / વ્યારામાં બે આશાસ્પદ મહિલા પોલીસકર્મીઓને ટેમ્પો ચાલકે કચડી મારતા ચકચાર

• ટેમ્પોએ મારી ટક્કર
• મોપેડ પર સવાર હતી બંને મહિલા પોલીસ
• થોડા દિવસ પહેલાજ પોલીસમાં થઈ હતી સામેલ

ગુજરાતમાં વ્યારા વ્યારા તાલુકાના ચાંપાવાડી ગામે ગોઝારી ઘટના ઘટી છે. મોપેડ પર સવાર બે મહિલા પોલીસને ટેમ્પોએ ટક્કર મારતા તેમના મોત નીપજ્યા છે. 

આ ઘટના અંગે જાણ થતાં કાકરાપાર પીએસઆઇ ઘટનાસ્થળે પહોંચી ગયા હતા. ચીખલવાવ ગામે ગામીત ફળિયામાં રહેતી સ્મિતાબેન હરીશભાઇ ગામીત અને વ્યારા તાલુકાના સરકૂવા ગામે રહેતી રિતિકાબેન ભૂપેન્દ્રભાઈ ગામીત થોડા મહિના પહેલાં ગુજરાત પોલીસમાં ભરતી થયા હતા. તેમની પસંદગી સુરત શહેર માટે થઈ હતી. આ બંને પોલીસ કર્મીઓની તાપી જિલ્લામાં ઇ ગુજકોપની ટ્રેનિંગ માટે કાકરાપાર પોસ્ટમાં કામગીરી કરતાં હતાં.

મહિલા પોલીસકર્મીની એક્ટિવા સાથે અથડાવી અકસ્માત કર્યો

સ્મિતા ગામીત અને રિતિકા ગામીત એક્ટિવા લઈને ઘરેથી નીકળી ગુજકોપની ટ્રેનિંગ માટે કાકરાપાર પોસ્ટ જવા નીકળ્યા હતા. તે દરમિયાન વ્યારા કાકરાપાર રોડ પર ચાપાવાડી ગામની સીમમાં પસાર થઇ રહ્યા હતા ત્યારે ઊંચા માળાથી આવતી પિકઅપ વાનચાલકે સ્ટિયરિંગ પરનો કાબૂ ગુમાવી મહિલા પોલીસકર્મીની એક્ટિવા સાથે અથડાવી અકસ્માત કર્યો હતો. જે અકસ્માતમાં સ્મિતાબેન ગામીત ઉંમર (27)ને ગંભીર ઇજા પહોંચતાં તેમને સારવાર માટે હોસ્પિટલમાં લઈ જતા ડોક્ટરે મૃત જાહેર કર્યાં હતાં. પાછળ બેઠેલા રિતિકાબેનને ગંભીર ઇજા પહોંચતાં પ્રાથમિક સારવાર વ્યારા બાદ સુરત ખાતે લઈ જવાયાં હતાં ત્યાં તેમનું મોત થયું હતું. બનાવ અંગે કાકરાપાર પોસ્ટને જાણ થતાં ઘટનાસ્થળે પહોંચી ગયા હતા અને ફરાર થયેલા પિકઅપચાલકની શોધખોળ હાથ ધરી હતી.