રોંગ સાઇડમાં ફૂલસ્પીડે આવેલી સ્કોર્પિયો કારે બાઇકમાં સવાર બાળક અને દંપતીને ટક્કર મારતા બાળકનું કમકમાટી ભર્યું મોત નીપજ્યું
સુરેન્દ્રનગરમાં સ્કોર્પિયો કાર અને બાઇક વચ્ચે અકસ્માત
બેફામ રીતે ચાલતી સ્કોર્પિયો કાર બાઇક સાથે અથડાઇ
બાળકનું સારવાર દરમિયાન મોત
ગુજરાતમાં હાઈવે પર અકસ્માતની ઘટનાઓ દિન પ્રતિદિન વધી રહી છે. ત્યારે આજે સુરેન્દ્રનગરમાં એક દંપતીને મંગળવાર, અમંગળવાર સાબિત થયો છે. સ્કોર્પિયો કાર અને બાઇક વચ્ચે થયેલી ભયાવહ ટકકરમાં 1 બાળકનું મોત નીપજ્યું છે. જ્યારે દંપતી ઘાયલ થતાં હોસ્પિટલ ખસેડવામાં આવ્યું છે.
ઘટનાની મળતી પ્રાથમિક માહિતી મુજબ પુરપાટ ઝડપે સ્કોર્પિયો કાર રોંગ સાઈડમાં આવી રહી હતી. અને સામેથી પોતાની સાઈડ ઘોરણ 6માં અભ્યાસ કરતાં દીકરા સાથે દંપતી આવી રહ્યું હતું. તેવા કાર ચાલકે બેફામ રીતે કાર હંકારી બાઈકને જોરદાર ટક્કર મારી હતી. બાઈકમાં સવાર બાળક અને તેનાઆ માતા-પિતા હવા ફંગોળાઈ ગયા હતા. અને ગંભીર ઈજાઓ પહોંચી હતી. બાઇક ચાલકનો પગ કપાઈ ગયો હતો, પાછળ બેઠલી પત્ની ઇજાઓ થતાં બેભાન અવસ્થામાં હતી. બાળક સુસ્ત અવસ્થામાં જીવન મરણ વચ્ચે ઝોલાં ખાઈ રહ્યો હતો.
અકસ્માતને જોતાં જ રાહદારીઓના ટોળે ટોળાં મદદ માટે આવી ગયા. 108ને ફોન કરી તાબડતોબ બોલાવી લેવામાં આવી હતી. બાઇક પર સવાર દંપત્તિ અને બાળકને હોસ્પિટલ સારવાર અર્થે ખસેડવામાં આવ્યા હતા. જ્યાં બાળકે જીવનને અલવિદા કહી દીધું હતું. આ દંપતી ચોટીલા બાળકનું શાળામાં એડમિશન લઈ પરત ફરી રહ્યું હતું.
રોંગ સાઇડમાં સ્કોર્પિયો કાર ચલાવી અકસ્માત સર્જનાર સામે પોલીસે અકસ્માતનો ગુનો નોંધી વધુ તપાસ હાથ ધરી છે. સ્કોર્પિયો કાર પર ભાજપ મહામંત્રીનું બોર્ડ લગાવેલું હતું. હાલ રાજકોટની હોસ્પિટલમાં દંપતી સારવાર લઈ રહ્યું છે. તેમણે પોતાના બાળકના મોતથી પણ તેઓ અજાણ છે. સ્કોર્પિયો કાર ચાલકની ભૂલના કારણે એક પરિવારનો માળો વિખાઈ ગયો છે.