છટકું / લાંચિયા અધિકારી પર ACBએ કસ્યો સકંજો, પાલનપુર અને ભુજમાં ગોઠવેલી સફળ ટ્રેપમાં 2 ઝબ્બે

• ACBની સફળ ટ્રેપ લાંચિયા કર્મી ઝડપાયા
• ભૂજથી C-GST નો કર્મી ઝડપાયો
• પાલનપુરમાં આસિ. લેબર કમિશનર ઝબ્બે

એન્ટી કરપ્શન બ્યુરો દ્વારા રાજ્યમાંથી બે લાંચિયા અધિકારીને ઝડપી પાડવામાં આવ્યા છે. કચ્છ અને બનાસકાંઠાથી ACBની સફળ ટ્રેપમાં બે કર્મચારીઓ રંગે હાથ લાંચ લેતા ઝડપાઈ ગયા છે. ગાંધીધામ સેન્ટ્રલ જીએસટી વિભાગના ઈન્સ્પેક્ટર શિવકેશ મીણા નામના કર્મચારીએ સિક્યુરિટી કંપનીમાં સરનામુ બદલવાની પ્રક્રિયા માટે રૂપિયા 10 હજારની લાંચ માગી હતી. 

પાલનપુરમાં આસિ. લેબર કમિશનર અશોક મોદી લાંચ લેતા ઝડપાયો
તો બીજી તરફ એસીબીને બનાસકાંઠાથી લેબર લાયસન્સ મેળવવા માટે લાંચ માંગ્યાની ફરિયાદ મળી હતી. જેમાં જીલ્લા સેવા સદનનો આસિસ્ટન્ટ લેબર કમિશનર અશોક મોદી નામનો લાંચિયો અધિકારી પકડાયો છે. અંદાજે 20 હજાર જેટલી લાંચ લેતા અધિકારી ઝડપાઈ જતાં ભ્રષ્ટાચાર આચરતા કર્મચારીઓમાં ફફડાટ ફેલાઈ ગયો છે.

લાંચિયાઓની લાલચ પર લગામ કેવી રીતે આવશે?
ગુજરાતમાં છેલ્લા કેટલાક દિવસથી એન્ટી કરપ્શન બ્યુરોની તાબડતોડ કાર્યવાહી જોવા મળી રહી છે.  આજે 2 લાંચિયા બાબુઓને ACBએ રંગે હાથ ઝડપી પાડ્યા છે. જ્યારથી ભૂપેન્દ્ર પટેલના નેતૃત્વમાં નવી સરકાર અને નવું મંત્રીમંડળ આવ્યુ છે ત્યારથી જ સરકાર ખુબ એક્શનમાં જોવા મળી રહી છે.તમામ મોર્ચે સરકાર હાલ લડાયક મુડમાં છે.ત્યારે ભ્રષ્ટ વહીવટદારો સામે આ કાર્યવાહીથી અન્ય ભ્રષ્ટ ઓફિસરોમાં પણ ફફડાટ ફેલાયો છે. અને હોવો પણ જોઈએ. કારણ કે અધિકારીઓને કામના બદલામાં ઉચ્ચ વેતન મળે છે. જાતભાતના ભથ્થા મળે છે. તેમ છતાં આવા ભ્રષ્ટ અધિકારીઓ લોકો પાસેથી નાણાં પડાવે છે.જે ક્યારેય ચલાવી ન લેવાય. અહીં કેટલાક સવાલો પણ ઉઠી રહ્યા છે કે અધિકારીઓની ભ્રષ્ટવૃત્તિનું દહન ક્યારે થશે?. લાંચિયાઓની લાલચ પર લગામ કેવી રીતે આવશે?