ગાંધીનગર: ACB દ્વારા મહાઓપરેશન હાથ ધરવામાં આવ્યું છે. મળતી માહિતી અનુસાર ગાંધીનગરમાં જમીન વિકાસ નિગમની ઓફિસમાં ACBએ દરોડા પાડયા હોવાની માહિતી પ્રાપ્ત થઇ છે. ગઈકાલથી શરૂ થયેલી દરોડાની કાર્યવાહી હજુ સુધી પૂરી થઈ નથી.
મળતી માહિતી અનુસાર ACBને સર્ચ ઓપરેશનમાં રૂ. 55 લાખથી વધુનો મુદ્દામાલ હાથ લાગ્યો છે. આ સિવાય એક સોનાનું બિસ્કીટ પણ મળી આવ્યું છે. પાટણ અને ગાંધીનગર સ્થિત અધિકારીઓના ઘરે પણ સર્ચ ઓપરેશન હાથ ધરાયું છે. ACBના ડાયરેકટર કેશવ કુમારની હાજરીમાં આ તપાસ ચાલી રહી છે. ACBએ આખી રાત અધિકારીઓની પૂછપરછ કરી હતી. તો પૂછપરછ બાદ ACBએ પંચનામાની કાર્યવાહી હાથ ધરી છે.
ગાંધીનગરમાં જમીન વિકાસ નિગમની ઓફિસમાં ACBએ પાડેલા દરોડાના મામલે 8 અધિકારીઓની પૂછપરછ કરવામાં આવી. અધિકારીઓના ઘરે પણ ACBએ કાર્યવાહી હાથ ધરી હતી. જેમાં ચાંદખેડા સ્થિત પરમેશ્વર બંગલોઝ પર પણ ACBએ સર્ચ હાથ ધર્યું હતું. ઓપરેશનના ભાગરૂપે ACBએ પાટણમાં પણ દરોડા પાડયા હતા. જેમાં અધિકારીઓના ઘરે મોડી રાતે સર્ચ ઓપરેશન હાથ ધરવમાં આવ્યું હતું.
જમીન વિકાસ નિગમની ઓફિસમાં ACBએ પાડેલા દરોડાની તપાસનો રેલો છેક પાટણ સુધી પહોંચ્યો છે. પાટણમાં રહેતા અને હિંમતનગરમાં ગુજરાત જમીન વિકાસ નિગમના આસિસ્ટન્ટ ડાયરેક્ટર તરીકે ફરજ બજાવતા મનહર દેસાઈના ઘરે ACBએ સર્ચ ઓપરેશન હાથ ધર્યુ. મોડી રાતે અહીં ACBએ તપાસ હાથ ધરી હતી. જેમાં અધિકારીના ઘરે દાગીના અને મિલકતના દસ્તાવેજોની તપાસ કરાઈ હતી. તો આજે અધિકારીની ઓફિસ અને બેંકના લોકરની પણ તપાસ કરવામાં આવશે.
ઉલ્લેખનીય છે કે ACBનું આ મહાઓપરેશન કહેવામાં આવે છે. કેમ કે અત્યાર સુધીમાં આ ઓપરેશન સૌથી મોટું અને લાંબુ 12 કલાક સુધી ચાલેલું આ ઓપરેશન છે.