પેટા હિસાબનીશ કર્મચારી વિવેક કેવડિયાએ ફરિયાદી પાસે તેના પતિના પેન્શનની રકમની ચુકવણી માટે રૂપિયા 60 હજારની લાંચ માંગી હતી
સુરતમાં લાંચિયો કર્મચારી ઝડપાયો
પેટા હિસાબનીશે માગી હતી લાંચ
ACBએ વિવેક કેવડિયાને રંગેહાથ ઝડપ્યો
સુરતના અઠવાલાઇન્સ ખાતે જિલ્લા સેવા સદનના આવેલી પેન્શન ચુકવણી કચેરીના વર્ગ ત્રણનો કર્મચારી લાંચ લેતા ઝડપાયો હતો. પેન્શન ચુકવણી કચેરીનો પેટા હિસાબનીશ કર્મચારી ACBના છટકામાં રૂપિયા 60 હજારની લાંચ લેતા ઝડપાઈ ગયો હતો .પોલીસે કર્મચારીની ધરપકડ કરી વધુ તપાસ હાથ ધરી છે.
રૂપિયા 60 હજારની લાંચ માંગી હતી
સુરતના અઠવાલાઇન્સ ખાતે સુરત જીલ્લા સેવા સદન-૨માં પેન્શન ચુકવણી કચેરી આવેલી છે.જેમાં કામ કરતા પેટા હિસાબની વર્ગ-3 ના કર્મચારી વિવેક કેવડિયા એસીબીના છટકામાં ખિસ્સું ગરમ કરતો પકડાઈ ગયો છે. વિવેક કેવડિયાએ ફરિયાદી પાસે તેના પતિના પેન્શનની રકમની ચુકવણી માટે રૂપિયા 60 હજારની લાંચ માંગી હતી.જેને લઇ ફરિયાદીએ એન્ટી કરપ્શન બ્યુરોમાં ફરિયાદ કરી હતી. ફરિયાદને પગલે એસીબી દ્વારા છટકું ગોઠવવામાં આવ્યું હતું. એસીબીએ ગોઠવેલી ટ્રેપ અનુસાર ફરિયાદી મહિલા માંગણી મુજબના રૂપિયા લઈને પેન્શન ચુકવણી કચેરી ખાતે ગઈ હતી. જ્યાં લાંચના રૂપિયા 60 હજાર લેતા કર્મચારી રંગે હાથ ઝડપાઈ ગયો હતો.
પેન્શનમાં અંદાજીત મળવા પાત્ર વધારાના રૂ.2.60 લાખ મળવાપાત્ર હતા
પોલીસે કર્મચારી વિવેક કેવડિયાની ધરપકડ કરી આગળની તપાસ હાથ ધરી છે. ફરિયાદીના પતિ સરકારી ખાતામાં નોકરી કરતા હતા.અને તે ચાલુ ફરજ દરમ્યાન મૃત્યુ પામ્યા હતા. જેથી તેમને મળતા કુટુંબ પેન્શનની રકમમાં મળવા પાત્ર વધારાની રકમ સરકારી ખાતા માંથી મેળવવાની બાકી હતી. પેન્શનમાં અંદાજીત રૂ.2.60 લાખ મળવાપાત્ર હતા. જેની વહેલી ચુકવણી થાય તે માટે પેટા હિસાબી કર્મચારી વિવેક કેવડીયાએ 60 હજાર રૂપિયાની લાંચ માંગી હતી. ફરિયાદી લાંચ આપવા ન માંગતા હોવાથી તેમણે એસીબીમાં ફરિયાદ કરી હતી.