રસ્તો બંધ / વરસાદમાં ફરવા ગુજરાતીઓની ફેવરિટ જગ્યા પર મુશ્કેલી: વાહનોને અટકાવાયા, લોકોને ન જવા અપીલ

• માઉન્ટ આબુમાં સતત બીજા દિવસે વાહન વ્યવહારને અસર
• માઉન્ટ જવાનો રસ્તો તૂટી જતા મુખ્ય હાઇવે કરાયો છે બંધ
• તંત્ર દ્વારા આબુરોડથી વાહનોને અટકાવવામાં આવ્યા
• મુખ્ય હાઈવે બંધ કરી દેવાતા મુશ્કેલી સર્જાઇ

ગુજરાત સહિત આખા ભારતમાં અત્યારે ગુલાબ વાવાઝોડાની અસરનાં કારણે ભારે વરસાદ થઈ રહ્યો છે. ફરવાનાં શોખીન ગુજરાતીઓ વરસાદનાં મોસમમાં માઉન્ટ આબુ જેવા હિલ સ્ટેશન પર પહોંચી જાય છે પરંતુ ગઇકાલથી માઉન્ટ આબુમાં વાહન વ્યવહાર ખોરવાયો છે. 

માઉન્ટ પર ન જવા માટે તંત્રની અપીલ

માઉન્ટ આબુમાં રસ્તો તૂટી જવાના કારણે મુખ્ય હાઇવે બંધ કરી દેવામાં આવ્યો છે. સતત બીજા દિવસે રસ્તો બંધ હોવાના કારણે વાહનોને તંત્ર દ્વારા આબુરોડથી વાહનોને અટકાવી દેવામાં આવ્યા હતા. આટલું જ નહીં લોકોને માઉન્ટ પર ન જવા માટે તંત્રએ લોકોને અપીલ કરી હતી. 

રાજ્યમાં શિયરઝોન થયું સક્રિય

આપને જણાવી દઈએ કે ઓડિશા અને આંધ્રપ્રદેશમાં જે ગુલાબ વાવાઝોડું ટકરાયું છે તેની અસર ગુજરાતના દરિયા કિનારે પણ જોવા મળશે. ગુલાબ વાવાઝોડાને કારણે ગુજરાતમાં ભારે વરસાદ પડી શકે છે. જેમા ગુજરાતને ક્રોસ કર્યા બાદ ગુલાબ વાવાઝોડું ફરી થશે સક્રીય. જેના કારણે રાજ્યમાં 29-30 સપ્ટેમ્બરે ભારે વરસાદ પડશે. સૌરાષ્ટ્ર, દ.ગુજરાતમાં પણ ભારે વરસાદ થશે, તેમજ ઉત્તર-મધ્ય ગુજરાતમાં હળવાથી ભારે વરસાદની શક્યતા વર્તાઈ રહી છે. 

અમદાવાદ, ગાંધીનગર, વડોદરામાં વરસાદ 

હવામાન વિભાગની આગાહી પ્રમાણે રાજ્યમાં મૂશળધાર વરસાદ વરસીરહ્યો છે. આજે બપોરના 12 વાગ્યા સુધીમાં કુલ 80 તાલુકામાં વરસાદ જોવા મળ્યો છે. જેમા સૌથી વધારે મહેસાણમાં 3.5 ઈંચ, બેચરાજીમાં 2.5 ઈંચ, કડીમાં 2.5, પોશીનામાં 2.5, વિસનગરમાં 2, ખેરાલુમાં 2, લખતરામાં 2 , હળવદમાં 1.5 ઈંચ અને રાજુલા તેમજ વિરમ ગામમાં સવા ઈંચ વરસાદ નોંધાયો છે. 

અમદાવાદમાં 1 વ્યકિતનું મોત

અમદાવાદમાં પણ આજે ભારે વરસાદ પડ્યો જેના કારણે સરખેજના વણઝરવાસ પાસે આવેલ ગરનાળામાં એક યુવક ગરકાવ થતા તેનું મોત નિપજ્યું છે. ભારે વરસાદને કારણે શહેરના મોટા ભાગના અંડરપાસમાં પાણી ભરાઈ ગયા છે. જે યુવક અંડરપાસમાં મૃત્યુ પામ્યો હતો. તેના મૃતદેહને ફાયર વિભાગની ટીમે ભારે જહેમત બાદ બહાર કાઢ્યો હતો.