એજન્ટો ખોટા પાસપોર્ટ બનાવી ભારતીય નાગરિકોને અમેરિકા મોકલે છે, અમદાવાદ ક્રાઇમ બ્રાંચની ટીમે 4 એજન્ટોની ધરપકડ કરતા મોટા ખુલાસા થયા છે
બનાવટી પાસપોર્ટથી વિદેશ મોકલતી ગેંગનો પર્દાફાશ
અમદાવાદ ક્રાઇમ બ્રાંચે 4 એજન્ટોની ધરપકડ કરી
બોગસ પાસપોર્ટ માટે મોટી રકમ પડાવતા હતા
ગાંધીનગર પોલીસએ કરેલ કબૂતરબાજી કૌભાંડ પર્દાફાશ બાદ એક પછી એક કિસ્સાઓ પ્રકાશમાં આવી રહ્યા છે.અમદાવાદ ક્રાઇમ બ્રાંચ દ્વારા આવો વધુ એક કબૂતરબાજીના રેકેટનો પર્દાફાશ કરી ચાર આરોપીઓને ઝડપી પાડ્યા છે.આરોપી કરોડો રૂપિયા લઈ ગેરકાયદે રીતે લોકોને વિદેશમાં મોકલતા હતા.
અમદાવાદ ક્રાઇમ બ્રાંચે 4 એજન્ટોની ધરપકડ કરી
ખોટા દસ્તાવેજ બનાવડાવી ડુપ્લીકેટ પાસપોર્ટ ઈશ્યુ કરાવી ભારતીય નાગરિકોને ગેરકાયદેસર યુ.એસ બોર્ડરથી ઘૂસણખોરી કરાવવાના રેકેટમાં સંડોવાયેલા ચાર આરોપીઓ પ્રજાપતિ રાજુ,હરેશ પટેલ, હાર્દિક પટેલ તથા રજત ચાવડાની ધરપકડ કરી છે.આરોપી હરેશ પટેલ અને તેનો પુત્ર હાર્દિક પટેલ છેલ્લા 3 વર્ષથી પાસપોર્ટ એજન્ટ તરીકે કામ કરે છે અત્યાર સુધીમાં 30 જેટલા ભારતીય નાગરિકોને પાસપોર્ટ તથા વિઝા કઢાવી વિદેશ મોકલી આપેલ છે.
મહેસાણાના રાજુ પ્રજાપતિ,શિલ્પા પટેલ અમેરિકા જવા માંગતા હતા
જ્યારે આરોપી રાજુ પ્રજાપતિ અને શિલ્પા પટેલને યુ.એસ જવું હોવાથી તેઓ પિતા-પુત્રનો સંપર્ક કર્યો હતો.જો કે યુ.એસ જવા માટે ફેમેલી ગ્રૂપ રીતે વિઝા પ્રોસીઝર કરવા માટે આરોપીઓ આરોપી રજત ચાવડાએ રાજુ પ્રજાપતિનો રાજેન્દ્ર ભીખાભાઈ પટેલ અને શિલ્પાનો રાજેન્દ્રની પત્ની કામિની પટેલ નામનો ખોટો પાસપોર્ટ બનાવીને બન્નેને પતિ-પત્ની તરીકે દર્શાવ્યા હતા.જે આધારે બન્ને નાઇઝેરીયા વિઝા માટે દિલ્હી ખાતે જઇ અરજી કરેલ હતી તે આધારે નાઇઝેરીયાથી મેક્સિકો ઓન એરાઈવલ વિઝા કરાવી યુ.એસ મેક્સિકો બોર્ડર થી યુ.એસ રેફ્યુઝી કેમ્પમાં મોકલી હંગામી એમરીકન સિટીઝનશીપ અપાવી સ્થાયી કરવાની ફિરાકમાં હતા.
એજન્ટો નામ,સરનામું,જન્મતારીખ બદલી એક વ્યક્તિ દીઠ 60 થી 65 લાખ રૂપિયા લેતા
આરોપીઓ દિલ્હી ખાતેના એજન્ટો મારફતે સમગ્ર નેટવર્ક ચલાવતા હોવાનું પોલીસ તપાસમાં સામે આવ્યું છે જેઓ એક વ્યક્તિ દીઠ 60 થી 65 લાખ રૂપિયા લેતા હતા. જેના બદલામાં જેતે વ્યક્તિને કે ફેમેલીને ભારતમાંથી ડુપ્લીકેટ પાસપોર્ટ કઢાવી આપી વિદેશના રેફ્યુઝી કેમ્પમાંથી બહાર લાવવાની જવાબદારીઓ એજન્ટો લેતા હતા.જ્યારે સંપૂર્ણ કામ પૂર્ણ થયા બાદ જ તેઓના પેમેન્ટની ચૂકણી કરવામાં આવતી હતી. આ નેટવર્કની તપાસમાં જુદા જુદા દેશોમાં આરોપીઓ ના એજન્ટો સક્રિય હોવાનું ખુલ્યું છે. જેને નાગરિકો ને બોર્ડર ક્રોસ કરવાની જવાબદારી સોંપવામાં આવી છે.
આ નકલી પાસપોર્ટ અને કબૂતરબાજીના નેટવર્કમાં આરોપીઓ અત્યાર સુધીમાં કેટલા લોકોને આ રીતે બનાવટી પાસપોર્ટ કઢાવી વિદેશ મોકલ્યા છે.અને અન્ય કોણ કોણ આ નેટવર્કમાં સંડોવાયેલ છે તે અંગે વધુ તપાસ શરૂ કરી છે.