અમદાવાદ / શહેરમાં સાહિત્ય અને કળાનો અનોખો અને એકમાત્ર પર્વ 'અભિવ્યક્તિ' શરુ થઇ રહ્યો છે આજથી; જાણો વિગત

“અભિવ્યક્તિ” એટલે કે એક્સપ્રેશન્સ! એક એવું સ્થળ જ્યાં કળાના જિજ્ઞાસુઓની પિપાસા સંતોષાય છે. હાલના સમયના શ્રેષ્ઠ કલાકારોને એક મંચ મળે અને રમઝટ થાય તેમના શ્રેઠતમ પ્રદર્શનોની. ૧૭ દિવસમાં કુલ ૭૯ કાર્યક્રમો, ૩૩ પરફોર્મન્સીસ અને ૪૩ વિઝ્યુઅલ આર્ટ પ્રોજેક્ટ્સ, એટલે કળાના ભાવકો માટે અદ્ભુત ખજાનો!

કાર્યક્રમની વિશેષતા

“અભિવ્યક્તિ”નો ધ્યેય કળાના વિવિધ પાસાઓને રોજબરોજના જીવન સુધી પહોંચાડવાનો અને મંત્રમુગ્ધ દર્શકોને વિશ્વને જોવાની એક નવી દ્રષ્ટિ કેળવી આપવાનો છે. પોતાના શહેરના પોતીકા કલાકારો જયારે તેમના હોમગ્રાઉન્ડ ઉપર તેમની સર્જનાત્મકતા પ્રદર્શિત કરે અને દર્શકોનો સ્નેહ મળે એટલે આહ્લાદક વાતાવરણ ઉભું થાય! 

કાર્યક્રમની તારીખ અને સમય

“અભિવ્યક્તિ”ની શરૂઆત આજથી એટલે કે 8 ફેબ્રુઆરીથી થઇ રહી છે. 8 અને 9 ફેબ્રુઆરીના દિવસે “અભિવ્યક્તિ”ની પ્રી ઇવેન્ટ યોજાશે જેમાં તથાગત વૈદ્ય, આકાશ ભટ્ટ, જીગ્નેશ સુરાણી, ચેતન દહિયા જેવા કલાકારો પરફોર્મ કરશે. 

14 ફેબ્રુઆરીથી આ 1 માર્ચ સુધી દરરોજ થનાર પ્રોગ્રામની યાદી અને આ દરેક પરફોર્મન્સની વધુ વિગતો વેબસાઈટ https://www.abhivyaktiart.org/events/ ઉપર જોઈ શકાશે.

કોણે અને કેમ જવું જોઈએ?

આ કાર્યક્રમ શહેરના કળા રસિકોને ઉદ્દેશમાં રાખીને યોજવામાં આવ્યો છે. કળાના રસપાનમાં કોઈ બાધા ન રહે એ માટે આ તમામ કાર્યક્રમમાં સૌને મફત પ્રવેશ આપવામાં આવી રહ્યો છે. 

શહેરના શ્રેષ્ઠ કલાકારો તેમના ક્ષેત્રનું સૌથી સારું પ્રદર્શન કરવા માટે ઉત્સુક છે. અહીં સરખા ક્ષેત્રના કલાકારો અને રસિકો એક મંચ પર ભેગા થઇ શકશે. કાર્યક્રમની સાથે શહેરમાં જે તે કળા ક્ષેત્રે શું પરિસ્થિતિ છે અને તેને સુધારવા શું કરી શકાય તે માટેની સકારાત્મક ચર્ચાઓને પણ અવકાશ રહેશે. ચાહકો અને નવોદિત કલાકારો પોતાના પ્રિય કલાકારોને લાઇવમાં જોઈ શકશે અને તેમના પ્રદર્શન ઉપરથી પોતાનું જ્ઞાન પણ વધારી શકશે.