મોટી સુવિધા / મોદી સરકારે શરૂ કરી નવી સુવિધા, આરોગ્ય સેતૂ યુઝર્સ હવે એક જગ્યાએ સંઘરી શકશે સ્વાસ્થ્ય સંબંધિત તમામ રેકોર્ડ

• સરકારે નવી સુવિધા શરૂ કરી
• યુઝર્સને તેમના સ્વાસ્થ્યનો રેકોર્ડ એક જ જગ્યાએથી મળી રહેશે
• જૂના અને નવા મેડિકલ રિપોર્ટ અપલોડ થશે

આરોગ્ય સેતુ એપનો ઉપયોગ કરતા લોકો માટે સરકારે એક નવી સુવિધા શરૂ કરી છે. આરોગ્ય સેતુ યુઝર્સને હવે તેમના સ્વાસ્થ્યનો રેકોર્ડ એક જ જગ્યાએ રાખવાની સુવિધા મળશે. હકીકતમાં સરકારે હવે નાગરિકોને આયુષ્માન ભારત હેલ્થ એકાઉન્ટ (ABHA) સાથે લિંક કરવા માટે આ નવી સુવિધા આપી છે. જે હેઠળ લોકો પહેલાથી જ આરોગ્ય સેતુ પર નોંધાયેલા છે, તેઓ એપ્લિકેશનમાંથી જ 14-અંકનો અનોખો નંબર મેળવી શકશે. તેઓ આ એકાઉન્ટ નંબર દ્વારા આયુષ્માન ભારત હેલ્થ એકાઉન્ટમાં તેમના જૂના અને નવા મેડિકલ રેકોર્ડ અપલોડ કરી શકશે.

પીએમ મોદીએ આયુષ્માન ભારત ડિજિટલ મિશનની શરૂઆત કરી હતી

અગાઉ ગયા વર્ષે સપ્ટેમ્બરમાં વડાપ્રધાન નરેન્દ્ર મોદીએ આયુષ્માન ભારત ડિજિટલ મિશનની શરૂઆત કરી હતી. આ યોજના હેઠળ દેશના દરેક નાગરિકનું હેલ્થ આઈડી તૈયાર કરવાની વાત સામે આવી હતી. આ યોજનાને લોન્ચ કરતા પીએમ મોદીએ કહ્યું કે, સ્વાસ્થ્ય ક્ષેત્રે આ એક ક્રાંતિકારી પગલું છે. તેમણે કહ્યું કે આ યોજનાએ દેશના ગરીબ અને મધ્યમ વર્ગના લોકોની સારવારમાં મહત્વની ભૂમિકા ભજવી છે, હવે તે ડિજિટલ સ્વરૂપમાં આવવાને કારણે વિસ્તરી રહી છે.

દરેક વ્યક્તિને હેલ્થ આઈડી મળશે

પીએમ મોદીએ કહ્યું કે, હવે દરેકને હેલ્થ આઈડી મળશે, આની મદદથી દર્દીઓ અને ડોકટરો તેમનો રેકોર્ડ ચેક કરી શકશે. જેમાં ડોકટરો, નર્સો સહિત અન્ય આરોગ્ય કર્મચારીઓનું રજીસ્ટ્રેશન, હોસ્પિટલ-ક્લીનિક-મેડીકલ સ્ટોરનું રજીસ્ટ્રેશન થઈ શકશે.

સૌથી વધુ ડાઉનલોડ કરાયેલી આરોગ્ય સેતુ એપ  

આપને જણાવી દઈએ કે, દેશભરમાં કોરોના વાયરસથી બચવા માટે બનાવવામાં આવેલી આરોગ્ય સેતુ એપને 12 કરોડથી વધુ લોકોએ ડાઉનલોડ કરી છે. 2 એપ્રિલે લૉન્ચ થયેલી આરોગ્ય સેતુ એપ હવે સૌથી વધુ ડાઉનલોડ થનારી હેલ્થ એપ બની ગઈ છે. સરકારે આ એપને ઘણા વિસ્તારોમાં ફરજિયાત બનાવી છે. ઘણી ઓફિસો, રેલ અને હવાઈ મુસાફરી દરમિયાન આ એપ હોવું ફરજિયાત કરવામાં આવ્યું છે. આ એપને કારણે દેશભરમાં 697 સંભવિત કોરોના હોટસ્પોટ વિશે માહિતી મળી છે.