ઘોષણાપત્ર / AAPએ જાહેર કર્યો ચૂંટણી ઢંઢરો, દિલ્હીને પૂર્ણ રાજ્યના દરજ્જો અપાવવા સહિતના આ છે વચનો

રાજધાનીમાં રાજ કરતી આમ આદમીની સરકારે લોકસભા ચૂંટણીને લઈને પોતાનો ચૂંટણી ઢંઢેરો જાહેર કરી દીધો છે. આમ આદમી પાર્ટીએ ભાજપ પર નિશાન સાધતા આ ચૂંટણી ઢંઢેરો તૈયાર કર્યો છે. જેમાં સૌથી પહેલો અને મહત્વપૂર્ણ મુદ્દો પૂર્ણ રાજ્યનો રાખવામાં આવ્યો છે. આ સાથે જ ચૂંટણી ઢંઢેરાના દરેક મુદ્દા સાથે એવું પણ જણાવ્યું છે કે, જો દિલ્હી પૂર્ણ રાજ્ય બનશે છે તો તમામ વાયદાને પૂર્ણ કરવામાં આવશે.

આમ આદમી પાર્ટીના ચૂંટણી ઢંઢેરામાં ખાસ શું છે. તેના પર નજર કરવામાં આવે તો સૌથી પહેલો મુદ્દો દિલ્હીને પૂર્ણ રાજ્યનો દરજ્જો આપવાનો છે. જો પૂર્ણ રાજ્ય બની ગયું તો દિલ્હીના 85 ટકા વિદ્યાર્થીઓને કોલેજોમાં એડમિશન આપવામાં આવશે. આ સાથે જ પોલીસને પણ જનતા પ્રત્યે જવાબદાર બનાવીશું. જેથી રાજ્યની દરેક મહિલા સુરક્ષીત રહી શકે.

આ સિવાય રાજ્યમાં જેટલા પણ હંગામી કર્મચારીઓ છે તેમને એક જ અઠવાડિયામાં કાયમી કરાશે. દિલ્હીના દરેક મતદારને સસ્તા અને સરળ હપ્તામાં ઘર મળશે. લાંચ રુસવત વિરોધી બ્યુરો દિલ્હી સરકાર હેઠળ આવશે. તો ભ્રષ્ટાચારને મુળમાંથી ઉખાડી ફેંકીશું. એટલું જ નહીં જનલોકપાલ બિલ પણ પાસ કરીશું. આવા તો અનેક મુદ્દાઓને આમ આદમી પાર્ટીએ પોતાના ચૂંટણી ઢંઢેરા જાહેર કર્યા છે.
 

પરંતુ આ બધા વાયદા કેજરીવાલ સરકાર ત્યારે પુરા કરશે જ્યારે દિલ્હી પૂર્ણ રાજ્ય બનશે. ત્યારે જોવાનું એ રહેશે કે, આમ આદમી પાર્ટીનો આ ચૂંટણી ઢંઢેરો કેટલો અસરકારક સાબિત થાય છે.

ચૂંટણી ઢંઢેરામાં શું છે ખાસ?

• દિલ્હીને પૂર્ણ રાજ્યનો દરજ્જો આપવા માગ   
• દિલ્હીના 85 ટકા વિદ્યાર્થીઓને કોલેજોમાં એડમિશન અપાશે  
• પોલીસને જનતા પ્રત્યે જવાબદાર બનાવીશું, મહિલાઓ સુરક્ષીત રહી શકશે  
• રાજ્યના હંગામી કર્મચારીઓને અઠવાડિયામાં જ કાયમી કરાશે  
• દિલ્હીના દરેક મતદારને સસ્તા અને સરળ હપ્તામાં ઘર મળશે  
• લાંચ રુશ્વત વિરોધી બ્યુરો દિલ્લી સરકાર હેઠળ આવશે   
• ભ્રષ્ટાચારને મુળમાંથી ઉખાડી ફેંકીશું  
• પૂર્ણ રાજ્ય બનશે તો જનલોકપાલ બિલ પણ પાસ કરીશું