કોરોના મહામારીએ દરેકના જીવનને અસ્તવ્યસ્ત કરી દીધુ છે. લોકો પોતાના જીવ બચાવવાની સાથે સાથે નોકરી બચાવવા પણ મથી રહ્યા છે અને જે લોકો પાસે કામ નથી તે વિના સંકોચ કોઇ પણ કામ કરીને પોતાનુ ગુજરાન ચલાવી રહ્યાં છે. તમે સાંભળ્યુ હશે કે પહેલા ખૂબ સારુ જીવન જીવતા લોકો આજે નાનુ મોટુ કોઇ પણ કામ કરવા તૈયાર થઇ ગયા છે. આ જ લિસ્ટમાં સમાવેશ થાય છે આમિર ખાન સાથે કામ કરી ચૂકેલ એક્ટર જાવેદ હૈદરનો. જે મુંબઇમાં શાક વેચીને તેનુ ગુજરાન ચલાવી રહ્યો છે.
બીજા ઘણા એક્ટર્સની જેમ જાવેદ પણ પૈસાની અછતથી પિડાઇ રહ્યો છે જેના કારણે તેણે શાક વેચવાનુ કામ શરૂ કરી દીધુ છે. હાલમાં જ ડોલી બિન્દ્રાએ જાવેદનો એક વીડિયો ટ્વિટ કર્યો છે જેમાં તે શાક વેચતા નજરે પડે છે.
ડોલીએ શૅર કર્યો વીડિયો
લૉકડાઉન વખતે દરેક ઉદ્યોગ બંધ થઇ ગયા હતા અને લોકોને કામ મળતુ પણ બંધ થઇ ગયુ હતું. ત્યારે જાવેદનો શાક વેચતો વીડિયો ડોલીએ શૅર કર્યો હતો. ડોલીએ લખ્યુ હતુ કે આ એક એક્ટર છે પરંતુ મજબૂરીમાં તે શાક વેચવા મજબૂર બન્યો છે.
શત્રુધ્ન સિન્હાના બાળપણના રોલમાં જાવેદ
આમિર ખાન સાથે કામ કર્યા પહેલા જાવેદ ફિલ્મ ખુદગર્ઝમાં શત્રુઘ્ન સિંહાના બાળપણના પાત્રમાં જોવા મળ્યો હતો. જેમાં તેની એક્ટિંગના ખૂબ વખાણ થયા હતા.
ટીવી સિરિયલ્સમાં કર્યુ છે કામ
બિગ બોસ ફેમ ડોલીએ કહ્યું કે જાવેદે સ્મોલ સ્ક્રિન પર પણ કામ કર્યુ છે. જાવેદે 2009માં બાબર અને જીની ઓર જૂજૂ નામની સિરિયલમાં અભિનયના ઓજસ પાથર્યા છે. તેમ છતાં આજે જાવેદ ને શાક વેચવાનુ કામ કરવુ પડી રહ્યું છે.
સંઘર્ષને સલામ
જાવેદે પોતે આ વીડિયો ટીકટોક પર શૅર કર્યો છે અને બેકગ્રાઉન્ડમાં દુનિયામેં જીના હો તો કામ કર પ્યારે તે ગીત વાગી રહ્યું છે. લોકો તેના સંઘર્ષને સલામ કરી રહ્યા છે અને કહી રહ્યા છે કે આ દિવસો પણ વિતી જશે અને જાવેદને ફરી ટીવી સ્ક્રિન પર જોઇ શકીશું.
જાવેદ પણ આ ગીતમાં લિપ સિંક કરતા જોવા મળે છે. ટીકટોક પર જાવેદ હૈદર સક્રિય છે, તેઓના ક્રિએટિવ વિડિઓ પ્લેટફોર્મ પર 97000 ફોલોઅર્સ છે. આ વીડિયો ટ્વિટર પર આવતાની સાથે જ લોકો જાવેદને સલામ કરી રહ્યા છે. લોકો કહે છે કે જાવેદે સાબિત કરી દીધું છે કે જીવન ગુમાવવાનું નહીં, પણ દરેક પરિસ્થિતિનો સામનો કરવાનું નામ છે.