વાહવાહી / આમિર ખાને કર્યા ધ કશ્મીર ફાઇલ્સના વખાણ, કહ્યું દરેક હિન્દુસ્તાનીએ જોવા જેવી ફિલ્મ!

• આમિર ખાને કર્યા ધ કશ્મીર ફાઈલ્સના વખાણ 
• દરેક હિન્દુસ્તાનીએ આ ફિલ્મ જોવી જોઈએ - આમિર ખાન 
• ફિલ્મ જીતી રહી છે દર્શકોનાં દિલ 

આમિર ખાને કર્યા ધ કશ્મીર ફાઈલ્સના વખાણ 

ડાયરેક્ટર વિવેક અગ્નિહોત્રી નાં નિર્દેશન હેઠળ બનેલી ફિલ્મ 'ધ કશ્મીર ફાઈલ્સ' દર્શકોને ખૂબ જ પસંદ આવી રહી છે. ચારે તરફ આ ફિલ્મની ચર્ચાઓ જોવા મળે છે, આવામાં ધીરે ધીરે બોલિવુડ સેલેબ્સ પણ આ ફિલ્મને લઈને પોતાની પ્રતિક્રિયાઓ આપી રહ્યા છે. બોલિવુડનાં મિસ્ટર પરફેક્શનિસ્ટ આમિર ખાને પણ અનુપમ ખેર સ્ટારર 'ધ કશ્મીર ફાઈલ્સ' પર વખાણનો વરસાદ કર્યો છે. આમિર ખાને 'ધ કશ્મીર ફાઈલ્સ'ની સફળતા માટે ટીમને અભિનંદન આપ્યા છે અને ટૂંક સમયમાં જ ફિલ્મ જોવાની પણ વાત કરી છે. આ સાથે જ તેમણે એ પણ કહ્યું છે કે આ ફિલ્મ દરેક ભારતીયએ જોવી જોઈએ. 

આમિર ખાન એસએસ રાજામૌલીની RRRના પ્રમોશન માટે દિલ્હી પહોંચ્યા હતા. ફિલ્મમાં રામચરણ, જુનિયર NTR, આલિયા ભટ્ટ લીડ રોલમાં છે. અહી તેમને ધ કશ્મીર ફાઈલ્સ પર સવાલ કરવામાં આવ્યો અને તેમણે જણાવ્યું કે હજુ સુધી તો તેમણે આ ફિલ્મ જોઈ નથી, પરંતુ જલ્દી જ તેઓ આ ફિલ્મ જોશે.  તેઓ કહે છે કે આ આપણા ઈતિહાસનો એક હિસ્સો છે, જેણે સૌનું દિલ દુખાવ્યું છે. કશ્મીરી પંડિતો સાથે જે પણ થયું, તે અત્યંત દુખદ છે. આ એક એવી ફિલ્મ છે, જે દરેક હિન્દુસ્તાનીએ જરૂર જોવી જોઈએ. આ ફિલ્મ દ્વારા દારેક હિન્દુસ્તાનીને જાણ થશે કે જ્યારે અત્યાચાર થાય છે, તો કેવું લાગે છે. 

ફિલ્મ જીતી રહી છે દર્શકોના દિલ 

ફિલ્મ પ્રોડયૂસર અને ડાયરેક્ટર વિવેક અનીહોત્રી આજકાલ પોતાની નવી ફિલ્મને લઈને ચર્ચામાં છે. કશ્મીરી પંડિતોની વેદના દર્શાવતી આ ફિલ્મ લોકોના દિલ જીતી રહી છે. લોકોની ભાવનાઓ આ ફિલ્મ સાથે જોડાયેલ છે. આ મુદ્દા પર પહેલા પણ ફિલ્મો બની હતી પરંતુ ક્યારેય આટલી ડેપ્થમાં આ મુદ્દા પર વાત કરવામાં આવી નથી. પરંતુ હવે વિવેક અગ્નિહોત્રીએ આ કરી બતાવ્યું છે. ફિલ્મને દેશભરની જનતાનો સપોર્ટ મળી રહ્યો છે અને સાથે જ સરકાર તરફથી પણ સમર્થન મળ્યું છે. 

કશ્મીરી પંડિતોનાં નરસંહારની સ્ટોરી 
ફીલ્મની સ્ટોરી વર્ષ 1990માં કશ્મીરી પંડિતોનાં નરસંહાર તથા તેમની સાથે થયેલા અન્યાય વિષે છે, જેમાં અનુપમ ખેર, મિથુન ચક્રવર્તી, દર્શન કુમાર અને પલ્લવી જોશીએ મુખ્ય ભૂમિકા નિભાવી છે. અભિષેક અગ્રવાલે પોતાના ટ્વીટર હેન્ડલ પર પીએમ મોદી સાથેની મુલાકાતની તસવીરો શેર કરતા પોતાના દિલની વાત સોશિયલ મીડિયા પર લખી છે.