આધારકાર્ડ / આઇટી કંપનીએ 7.8 કરોડ લોકોના આધાર ડેટા ચોરી કર્યા! કેસ દાખલ

તેલંગણા અને આંધ્રપ્રદેશની કુલ વસતી 8.4 કરોડ છે. કંપની આ આધાર ડેટાનો ઉપયોગ ટીડીપીના સેવા મિત્ર એપના ડેવલપમેન્ટ માટે કરી રહી હતી. ફરિયાદ અનુસાર આ ડેટા રિમૂવેબલ સ્ટોરેજમાં સાચવી રખાયો હતો, જે આધાર એક્ટનું ઉલ્લંઘન છે. ફોરેન્સિક નિષ્ણાંતોના મતે કંપનીએ આ ડેટા સેન્ટ્રલ ડેટા રિપોઝિચ્ટરી અથવા સ્ટેટ ડેટા હબમાંથી ગેરકાયદેસર રીતે હાંસલ કર્યો છે. આ કેસ હવે ડેટા ચોરીના કેસોની તપાસ કરતી SITને સોંપવામાં આવે તેવી સંભાવના છે.

ગ્રિડ્સ કંપનીની કચેરીમાંથી મળેલી હાર્ડ ડિસ્કના વિશ્લેષણ દરમિયાન સ્ટેટ ફોરેન્સિક સાયન્સ લેબોરેટરીએ જણાવ્યું હતું કે, તેલંગણા અને આંધ્રપ્રદેશના 6 કરોડ નાગરિકોના આધાર સંબંધિત ડેટા આ કંપની પાસે છે. કંપની પાસેથી મળેલા ડેટા બેઝની ડિઝાઇન અને સાઇઝ UIDAI પાસે હોય છે તેવાં જ છે.
તેલુગુ દેશમ પાર્ટીએ આ મામલે સ્પષ્ટતા આપી હતી. જણાવ્યું કે, આધારના ડેટા સુધી અમારી પહોંચ નથી અને તેનો ઉપયોગ ફક્ત કલ્યાણકારી યોજનાઓના લાભાર્થીઓની ચકાસણી માટે જ કરાય છે. સીટની સૂચનાના આધેરે UIDAIએ માધાપુર પોલીસ સ્ટેશનમાં આધાર એક્ટની વિવિધ કલમો અંતર્ગત કેસ દાખલ કર્યો છે.

UIDAIના નાયબ નિયામક ટી ભવાની પ્રસાદે જણાવ્યું કે, અત્યાર સુધીની તપાસમાં સામે આવ્યું છે કે, ટીડીપીની સેવામિત્ર એપ શંકાસ્પદ રીતે મતદારોના પ્રોફાઇલિંગ, ટાર્ગેટેડ કેમ્પેઇિંનંગ, મતદારોના નામ મતદાર યાદીમાંથી હટાવી દેવા માટે આંધ્રપ્રદેશ અને તેલંગણાના મતદારોની ચોરેલી માહિતી અને આધાર ડેટાનો ઉપયોગ કરતી હતી.