વિદેશ જવા ઈચ્છતા લોકો માટે ચેતવણીરૂપ કિસ્સો સામે આવ્યો છે. ઉમરેઠનો યુવક છેતરપિંડીનો શિકાર બન્યો છે. યુવકે સાયબર ક્રાઈમમાં 4 શખ્સો સામે ફરિયાદ નોંધાવી છે.
યુવકે અમેરિકા જવાની લાલચમાં ગુમાવ્યા રૂપિયા
સોશિયલ મીડિયાના માધ્યમથી ઠગ ટોળકીએ યુવકનો સાધ્યો હતો સંપર્ક
વિદેશ જવાની લ્હાયમાં લોકો સાથે અનેકવાર ઠગાઈની ઘટનાઓ દિવસેને દિવસે બનતી હોય છે. ત્યારે અન્ય સાથે થયેલી ઠગાઈની ઘટનાઓ બાદ પણ લોકો લાલચમાં આવી જઇ સોશિયલ મીડિયા મારફતે અથવા એજન્ટ મારફતે વિદેશ જવાની લાયમાં લાખો રૂપિયા ખોઈ બેસે છે. ત્યારે આવી જ એક ઠગાઈની ઘટના આણંદ જિલ્લામાં બની છે.
ઉમરેઠનો યુવક છેતરપિંડીનો શિકાર બન્યો
US કાઉન્સિલેટર જનરલ મુંબઈ નામના પેજ દ્વારા ઉમરેઠનો યુવક છેતરપિંડીનો શિકાર બન્યો છે. ઠગ ટોળકીએ યુવક પાસેથી ટુકડે-ટુકડે 63.50 લાખ રૂપિયા પડાવી લેતા યુવકે 4 શખ્સો વિરુદ્ધ સાયબર ક્રાઇમમાં ફરિયાદ નોંધાવી છે.
સોશિયલ મીડિયાથી સાંધ્યો સંપર્ક
ફરિયાદ મુજબ, ઉમરેઠ શહેરના પીપળી માતા મંદિર પાસે રહેતા અને સાયબર કાફેનો વ્યવસાય કરતા નીરવ પટેલની બહેનને વિદેશ જવાનું હતું. જેથી વર્ષ 2017માં તેને સોશિયલ મીડિયા પ્લેટફોર્મ ફેસબુક પર "US કાઉન્સિલેટર જનરલ મુંબઈ" નામનું પેજ જોવા મળ્યું હતું. જેથી તેણે એ પેજ પર કોમેન્ટ કરતા મિ. ડેવીસ ફર્નાડીસ નામના વ્યક્તિએ નીરવ પટેલનો સંપર્ક કર્યો હતો. આ શખ્સે નીરવને પોતે વિઝીટર વિઝા માટે ટૂર ઓપરેટ કરતો હોવાનું જણાવી તેના આસીસ્ટન્ટ જીગર પટેલનો નંબર આપ્યો હતો.
આંગડિયા પેઢી દ્વારા રૂપિયા મોકલવા જણાવ્યું
જે બાદ નીરવે જીગર પટેલનો સંપર્ક કર્યો હતો. જીગર પટેલે ટુરીસ્ટ વિઝા માટે વ્યક્તિ દીઠ 35 લાખ રૂપિયા (18 હજાર એપ્લીકેશન ફી, 3.40 લાખ હોટલ બુકીંગનો ખર્ચ તથા રૂ.1.80 લાખ જવાની ટિકિટના તથા બાકીના બોન્ડ ભરવાના થશે. ટૂર પુરુ થયા બાદ બોન્ડના ખર્ચના રૂપિયા પરત મળશે) ભરવા જણાવ્યું હતું. સાથે તેણે બેંક દ્વારા પૈસા મોકલશે તો ટેક્સ ભરવો પડશે તેથી આંગડિયા પેઢી દ્વારા રૂપિયા મોકલવા જણાવ્યું હતું.
4 શખ્સો સામે ફરિયાદ દાખલ
જે બાદ જીગર પટેલે હાર્દિક પટેલ નામના વ્યક્તિનો સંપર્ક કરાવ્યો હતો. હાર્દિક પટેલે પોતે કલાસ વન ઓફિસર હોવાની ઓળખ આપી નીરવ પટેલને મળવા માટે યુએસ કાઉન્સીલેટની કચેરી મુંબઈ ખાતે બોલાવ્યો હતો. જે સમયે હાર્દિક પટેલ યુએસ કાઉન્સીલેટરની સામે રોડ પર મળ્યો હતો. તે વખતે તેઓની સાથે બીજા ત્રણ વ્યક્તિઓ પણ હાજર હતાં. આમ લોભામણી લાલચમાં આવીને નીરવે 2017થી 2019ના ઓગષ્ટ મહિના સુધીમાં રૂ.63.50 લાખ જેવી રકમ આંગડીયા થકી મોકલાવી હતી. જે બાદ પોતાની સાથે ઓનલાઇન ફ્રોડ થયાનું જણાતાં ઉમરેઠના નીરવ પટેલે સાયબર ક્રાઇમમાં દિપક શાહ, જીગર પટેલ, હાર્દિક પટેલ અને ડેવિડ ફર્નાન્ડિસ વિરુદ્ધ ફરિયાદ નોંધાવી છે.