હડકંપ / Disneyland ફરવા આવેલી મહિલા નીકળી કોરોના પોઝિટિવ તો ચીને હજારો લોકોને કર્યા 'લૉક', શહેર આખામાં અફરાતફરી

• Disneylandની મુલાકાત લેવા આવેલી એક મહિલાનો કોરોના રિપોર્ટ પોઝિટિવ
• Disneyland ફરવા ગયેલા હજારો પર્યટકો જ્યારે પાર્કમાં જ કેદ થયા 
• ઘટના દરમિયાન લોકો કેટલાય કલાકો સુધી પાર્કમાં બંધ રહ્યા

ચીનના શાંઘાઈમાં Disneyland ફરવા ગયેલા હજારો પર્યટકો જ્યારે Disney પાર્કમાં જ કેદ થઈ ગયા ત્યારે તેમને વિચિત્ર પરિસ્થિતિનો સામનો કરવો પડ્યો. તેનું કારણ એ હતું કે, પાર્કની મુલાકાત લેવા આવેલી એક મહિલાનો કોરોના રિપોર્ટ પોઝિટિવ આવ્યો હતો. આ પછી ઝીરો કોવિડ નીતિને પગલે ચીનમાં અરાજકતા જોવા મળી હતી.
 
આ તરફ ચીની સત્તાવાળાઓએ શાંઘાઈમાં ડિઝની પાર્કનો દરવાજો બંધ કરી દીધો. આ દરમિયાન પાર્કની મુલાકાત લેવા આવેલા હજારો લોકો ત્યાં જ રોકાઈ ગયા હતા. અહીંથી આ લોકોને માત્ર એક જ શરતે જવા દેવાયા જ્યારે તેમનો કોરોના રિપોર્ટ નેગેટિવ આવ્યો.આ સમગ્ર ઘટના દરમિયાન લોકો કેટલાય કલાકો સુધી પાર્કમાં બંધ રહ્યા.

રોઇટર્સ અનુસાર ચીની સત્તાવાળાઓએ બાદમાં શાંઘાઈ શહેરના રહેવાસીઓને કહ્યું કે, જો તેઓ મંગળવારે શાંઘાઈમાં ડિઝની પાર્કની મુલાકાત લેશે તો તેમના બાળકો ગુરુવારથી શાળાએ કે કામ પર જઈ શકશે નહીં. આ લોકોને આગામી ત્રણ દિવસમાં કોરોના ટેસ્ટ કરાવવા માટે કહેવામાં આવ્યું હતું.

એક વ્યક્તિએ કહ્યું કે, તેને ચીની અધિકારીઓ દ્વારા કહેવામાં આવ્યું હતું કે, તેના પરિવારને સેન્ટ્રલ ક્વોરેન્ટાઇનમાં જવું પડશે. તમને જણાવી દઈએ કે,ચીનના ઘણા શહેરોમાંથી લોકો શાંઘાઈની મુલાકાતે આવ્યા હતા અને તે જ સમયે તેઓ હેલોવીનની રજાઓ મનાવી રહ્યા હતા. એક મહિલાએ કહ્યું કે,  તેને થાકીને રાત્રે 10 વાગ્યે પાર્કમાંથી બહાર આવવું પડ્યું. પછી તેને ભૂખે મરવું પડ્યું અને તે ઠંડીથી ધ્રૂજી રહ્યો હતો.

શું કહેવું છે અધિકારીઓનું ? 

શહેરના અધિકારીઓનું કહેવું છે કે, હાલમાં જ 31 વર્ષની એક મહિલા આ પાર્કની મુલાકાત લેવા આવી હતી. બાદમાં આ મહિલાનો કોરોના ટેસ્ટ પોઝિટિવ આવ્યો હતો. એક રિપોર્ટ અનુસાર, ગયા અઠવાડિયે ચીનના 28 શહેરોમાં લોકડાઉન લાગુ કરવામાં આવ્યું છે. જેના કારણે 20.8 કરોડની વસ્તી પ્રભાવિત થઈ છે.

નોંધનીય છે કે, 17 ઓગસ્ટ પછી ચીનમાં 1 ઓક્ટોબરના રોજ સૌથી વધુ કોરોના કેસ સામે આવ્યા છે. અહીં 2719 કેસ નોંધાયા છે. આંતરરાષ્ટ્રીય ધોરણો અનુસાર આ આંકડો ઓછો હોઈ શકે છે. પરંતુ આ આંકડાઓએ શૂન્ય કોવિડ નીતિને અનુસરતા ચીન માટે ખળભળાટ મચાવ્યો છે. તાજેતરના આંકડાઓ પછી, સરકારે ગુઆંગઝુ અને દાનદોંગમાં પ્રતિબંધને લંબાવ્યો છે.