પતિને અગાઉની પત્નીથી બે સંતાન હતા, જે મહિલાને માનસિક ત્રાસ આપી ઓરમાયું વર્તન કરતાં હતા
અમદાવાદના મણિનગર વિસ્તારનો બનાવ
૪૬ વર્ષીય મહિલાએ પતિ અને સાસરિયાં સામે નોંધાવી ફરિયાદ
શારીરિક અને માનસિક રીતે હેરાન કરવામાં આવતી: પીડિત મહિલા
શહેરના મણિનગર વિસ્તારમાં રહેતી ૪૬ વર્ષીય મહિલાના પતિને પ્રોસ્ટેટની બીમારી હોવાથી તે શારીરિક સુખ આપતો ન હતો તેમજ પતિ અવારનવાર ખોટા શક-વહેમ રાખીને પત્નીને મારઝૂડ કરતો હોવાથી કંટાળીને મહિલા પોલીસ સ્ટેશનમાં ફરિયાદ નોંધાવી છે.
મહિલાએ નોંધાવી પોલીસ ફરિયાદ
મણિનગર વિસ્તારમાં છેલ્લા દસ મહિનાથી ભાડાના મકાનમાં રહેતી ૪૬ વર્ષીય મહિલાએ પતિ તેમજ સાસરિયાં વિરુદ્ધ ફરિયાદ નોંધાવી છે. મહિલાનાં આ બીજાં લગ્ન વર્ષ ર૦ર૦માં થયાં હતાં. મહિલાનાં જે પુરુષ સાથે લગ્ન થયાં તેનાં પણ આ બીજાં લગ્ન હતાં. મહિલાના પતિને અગાઉની પત્નીથી બે સંતાન હતાં. લગ્ન બાદ મહિલાને જાણ થઈ કે તેના પતિને કોલેસ્ટ્રોલ, બ્લડ પ્રેશર અને ડાયાબિટીસની બીમારી છે. મહિલાએ આ બાબતે વાત કરતાં પતિએ ઉશ્કેરાઈ જઈને કહ્યું કે આ ઉંમરે તો આવી સામાન્ય બીમારી થાય તેમ કહી મહિલાને અડધૂત કરતો હતો.
પુત્ર અને પુત્રવધુ પણ માનસિક ત્રાસ આપતા
લગ્ન બાદ પતિની પહેલી પત્નીનાં સંતાનો મહિલાને સ્વીકારતાં ન હતાં અને વારંવાર ઓરમાયું વર્તન કરતાં હતાં આટલું જ નહીં, મહિલા જમવાનું બનાવે તો તેમાં પણ વાંધા કાઢી ઝઘડો કરતાં હતાં. મહિલાના પતિની પહેલી પત્નીની પુત્રવધૂ માસિકમાં થાય તો ડાઘ જમીન પર પડે તો તે આ મહિલા સાથે સાફ કરાવતા હતા. પુત્રવધૂ શરીરના વાળ કાપી જમીન પર ફેંકતી તો તે પણ મહિલા પાસે સાફ કરાવતા હતા. જ્યારે મહિલાએ મેરેજ સર્ટિફિકેટ અને અન્ય ડોક્યુમેન્ટ કઢાવવાનું કહ્યું ત્યારે પતિના પહેલી પત્નીના પુત્ર અને તેની પત્નીએ છ મહિના રહો, પછી એ પ્રોસેસ કરાવીશું તેમ જણાવ્યું હતું. થોડા સમય બાદ મહિલાના પતિએ ભાડે રહેવા જણાવતાં મહિલાએ ચાર મકાન હોવાથી ભાડે રહેવાની શું જરૂર છે તેવું કહેતાં પતિએ તેં મિલકતને પ્રેમ કર્યો છે કે મને તેમ કહીને ઝઘડો કર્યો હતો.
પતિને બીમારી હોવાથી મહિલાને શારીરિક સુખ ન મળતું
બીજી તરફ મહિલાના પતિને પ્રોસ્ટેટની બીમારી હોવાથી તે મહિલાને શારીરિક સુખ પણ આપતો ન હતો. પતિના જન્મ દિવસની તૈયારી કરવા માટે મહિલા બહાર સામાન લેવા ગઈ તો તેના પતિએ વીડિયો કોલ કર્યો હતો. જે કોલ ન રિસીવ કરતાં પત્ની સાથે પતિ ઝઘડો કરી અલગ રહેવા લાગ્યો હતો. પતિ અવારનવાર શક-વહેમ રાખીને મહિલાને મારઝૂડ કરતો હતો, જેથી મહિલાએ કંટાળીને મહિલા પોલીસ સ્ટેશનમાં તેના પતિ તેમજ પતિની પહેલી પત્નીના પુત્ર અને પુત્રવધૂ સહિત છ લોકો સામે ફરિયાદ નોંધાવી છે. મહિલા પોલીસે ગુનો નોંધી વધુ તપાસ હાથ ધરી છે.