ગુજરાતના ભાવિને નશાના રવાડે ચઢાવવાના કારસા છેલ્લા ઘણા સમયથી થઇ રહ્યા છે. દારૂ અને ડ્રગ્સની હેરાફેરીના કિસ્સાઓ વધી રહ્યા છે ત્યારે જાણે હવે નશાખોરોને પોલીસનો કોઇ ડર રહ્યો જ ન હોય તેમ લાગી રહ્યું છે. કારણ કે અમદાવાદના ઇસનપુર ખાતેથી એક ચોંકાવનારો વીડિયો સામે આવ્યો છે. જેમાં જાહેર સ્થળ પર જ કેટલાક શખ્સો હુક્કાની મહેફિલ માણતા હોવાનું જોવા મળ્યું છે.
ઇસનપુરના પબ્લિક ગાર્ડનમાં હુક્કાપાર્ટી
મહત્વનું છે કે અમદાવાદના એવા ઘણા વિસ્તારો છે જ્યાં દારુબંધીની પોલ ખોલતા દ્રશ્યો સામે આવે છે. ત્યારે હવે પ્બલિક પ્લેસ પર ગાર્ડનની અંદર જ બેફામ બનીને હુક્કાપાર્ટી કરતા કેમેરામાં કેદ થયા છે. મણિનગરમાં આવકાર હોલ ઘોડાસર ચોકડી પાસે આવેલા ગાર્ડનના આ દ્રશ્યો છે. અનેક લોકો હાજર હોવા છતાં પણ સ્હેજ પણ ડર વિના આ શખ્સો હુક્કાપાર્ટી માણી રહ્યા હતા. સમગ્ર ઘટના સામે આવતા પોલીસ પણ દોડતી થઇ છે.
જાગૃત નાગરિકે વીડિયો ઉતાર્યો
આ વિસ્તારના જ એક જાગૃત નાગરિકે હિંમતભેર આ ઘટનાનો વીડિયો ઉતારી લીધો હતો. વીડિયોમાં જોઇ શકાય છે કે ચાર-પાંચ છોકરાઓ ગાર્ડનમાં બેસીને હુક્કો પી રહ્યા છે. ગાર્ડનમાં જ આ પ્રકારની પ્રવૃત્તિને કારણે લોકો પોતાના બાળકોને સાથે લઇને ગાર્ડનમાં આવતા ડરી રહ્યા છે. ત્યારે આ મામલે હવે પોલીસ દ્વારા વધુ તપાસ હાથ ધરવામાં આવી છે.