સામાન્ય લોકો તો સરકારની જમીન પર શરતો ભંગ કરતાં હોય છે પરંતુ બનાસકાંઠામાં સરકારના પ્રતિનિધિ એવા ધારાસભ્ય એ જ સરકાર દ્વારા ફાળવવામાં આવેલી જમીનમાં શરત ભંગ કર્યો હોવાની ચોંકાવનારી વિગતો સામે આવી છે. જે મામલે રજૂઆત થતા મામલતદારે તપાસ કરી કલેક્ટરને રિપોર્ટ મોકલી આપ્યો છે.
બનાસકાંઠામાં ધાનેરા વિધાનસભા મત વિસ્તારના કોંગ્રેસના ધારાસભ્ય નાથાભાઇ પટેલે સરકાર દ્વારા ફાળવવામાં આવેલી ખેતીની જમીનમાં શરત ભંગ કરી હોવાની ફરિયાદ થઈ છે.
ગત વર્ષે યોજાયેલી વિધાનસભાની ચૂંટણીમાં ધાનેરા વિધાનસભા મતવિસ્તારની જનતાએ ખોબલે ખોબલે મત આપીને કોંગ્રેસના નાથાભાઇ પટેલને વિજેતા બનાવ્યા હતા. નાથાભાઇ પટેલ ભારતીય રાષ્ટ્રીય કોંગ્રેસ વતી ચૂંટણી લડીને વિજેતા થયા હતા પરંતુ વર્તમાન સમયમાં નાથાભાઇ પટેલની મુશ્કેલીઓ વધી ગઈ છે.
ગામના જ એક જાગૃત નાગરિક દ્વારા ફરિયાદ કરવામાં આવી જેમાં વર્ષ ૧૯૯૫માં જિલ્લા કલેક્ટર દ્વારા નાથાભાઇ પટેલને ધાખા ગામમાં ગૌચરની જમીન ખેતી કરવા માટે ફાળવવામાં આવી હતી.
સરકાર દ્વારા ફાળવવામાં આવેલી આ જમીન કેટલીક શરતોને આધીન ફાળવવામાં આવી હતી. જેમાં આ જમીન પર માત્ર ખેતી જ કરવાની શરત નક્કી કરવામાં આવી હતી પરંતુ સમય જતાં નાથાભાઇ પટેલે આ જમીન પર મકાનો બાંધી દીધા અને પ્લોટો પાડીને સરકાર દ્વારા નક્કી કરવામાં આવેલી શરતોનો ભંગ કર્યો હોવાની ફરિયાદ કરી છે.
ધારાસભ્ય સામે થયેલા શરત ભંગના આક્ષેપો પાયા વિહોણા હોવાનું ધારાસભ્ય નથાભાઈ પટેલ જણાવી રહ્યા છે તો આ ફરિયાદ પણ રાજકીય કિન્નખોરી રાખી કરવામાં આવી હોવાનું માની રહ્યા છે.
આ અંગે ધાનેરા તાલુકાનાં ધાખા ગામના જાગૃત નાગરિક નરોત્તમભાઈ પટેલે આ અંગે સ્થાનિક મામલતદારને સરકાર દ્વારા નાથાભાઇ પટેલને ફાળવવામાં આવેલી જમીનમાં શરત ભંગ થયો હોવાની અરજી કરતાં સ્થાનિક મામલતદારે ઘટનાસ્થળે પહોંચી પંચો સાથે રાખી તપાસ કરતાં સરકાર દ્વારા ફાળવવામાં આવેલી જમીનમાં તપાસ કરતા પ્રાથમિક દૃષ્ટિએ શરતભંગ થયો હોવાનું નકાર્યું હતું પરંતુ અરજદારે આ અંગે ઠોસ પુરાવા રજુ કરતા મામલતદારે બનાસકાંઠા જિલ્લા કલેક્ટરને રિપોર્ટ રજૂ કર્યો છે.
હાલમાં સરકાર દ્વારા નાથાભાઇ પટેલે ફાળવવામાં આવેલી જમીન તરફ જતાં માર્ગો પર ફાર્મહાઉસના બોર્ડ લગાવ્યા છે. સામાન્ય વ્યક્તિ જ્યારે દબાણ આચારે અથવા તો સરકાર દ્વારા ફાળવવામાં આવેલી જમીનનો શરત ભંગ કરે ત્યારે સરકાર તાત્કાલિક આ બાબતે એક્શન લઈને જમીનને શ્રીસરકાર કરાવતી હોય છે ત્યારે હવે જોવાનું એ રહે છે કે નાથાભાઇ પટેલ કે જે ધારાસભ્ય છે અને પ્રજાના પ્રતિનિધિ છે તેમની સામે થયેલી ફરિયાદ માં કલેક્ટર શુ કાર્યવાહી કરે છે તે જોવું રહ્યું.