Surat City Bus Video: સુરતની સિટી બસનો એક વીડિયો સોશિયલ મીડિયા પર ખૂબ વાયરલ થઈ રહ્યો છે. જેમાં બસનો ચાલક રોંગ સાઈડમાં ફૂલ સ્પીડમાં બસ દોડાવતો જોવા મળી રહ્યો છે.
સિટી બસ ચાલકની ગંભીર બેદરકારી
રોંગ સાઈડમાં ફૂલ સ્પીડમાં ચલાવી બસ
બસનો વીડિયો સો.મીડિયામાં વાયરલ
સુરત શહેરમાં અકસ્માતના બનાવો બનતા રહે છે. તેમજ ભૂતકાળમાં સિટી બસ ચાલકોએ લોકોને અડફેટે લીધા બાદ મોત થયાની ઘટનાઓ પણ સામે આવી ચૂકી છે. ત્યારે સુરત સિટી બસનો એક વીડિયો વાયરલ થયો છે. વાયરલ વીડિયોમાં સિટી બસનો ચાલક ફૂલ સ્પીડમાં રોંગ સાઈડમાં બસ ચલાવતો જોવા મળી રહ્યો છે. આ વીડિયો સોશિયલ મીડિયા પર વાયરલ થતાં લોકો પાલિકાના સિટી બસ સેવાની સામે અનેક સવાલ ઉઠાવી રહ્યા છે.
વીડિયો થયો વાયરલ
સુરત મનપાના સિટી બસના ડ્રાઈવરની બેદરકારી સામે અત્યાર સુધી અનેક વાતો થતી હતી અને આક્ષેપો થતાં હતાં, ત્યારે સુરતમાં સિટી બસ ચાલકની વધુ એક ગંભીર બેદરકારી સામે આવી છે. સોશિયલ મીડિયા પર વાયરલ થયેલા એક વીડિયોમાં સિટી બસનો ડ્રાઈવર રોંગ સાઈડમાં બસ દોડાવતો જોવા મળી રહ્યો છે.
કોઈ મોટી દુર્ઘટના સર્જાય તો જવાબદારી કોની?
રાહદારી દ્વારા આ વીડિયો ઉતારીને વાયરલ કરવામાં આવ્યો છે. એવું કહેવામાં આવી રહ્યું છે કે આ વીડિયો ગોડદરા ડીંડોલી બ્રિજ પરનો છે. ટ્રાફિકથી ધમધમતા બ્રિજ પર પાલિકાની બસના ડ્રાઈવરે ફૂલ સ્પીડમાં રોંગ સાઈડમાં બસ દોડાવી હતી. રોંગ સાઈડમાં બસ ચલાવવાથી અઘટિત ઘટના બનશે તો જવાબદાર કોણ તે મોટો સવાલ છે.