કારમાં જઇ રહેલી બે વ્યક્તિએ પીછો કરી ઉતાર્યો વીડિયો
સુરતમાં આવેલા ડુમ્મસ બીચને ભૂતિયા બીચ તરીકે ઓળખવામાં આવે છે. અહીં બનાવવામાં આવેલી પોલીસ ચોકીમાં ફરજ બજાવતા કેટલાક પોલીસ કર્મીઓને પણ ભૂતનો અનુભવ થયાની ચર્ચા છે. ત્યારે હાલ એક વીડિયો સોશિયલ મીડિયામાં વાયરલ થયો છે. વીડિયોમાં 8થી 10 ફૂટની આકૃતિ ફરતી દેખાઈ છે. કારમાં જઇ રહેલા બે વ્યક્તિએ આ વીડિયો ઉતાર્યો છે. જો કે, આ વીડિયોની VTV ગુજરાતી પુષ્ટિ કરતું નથી.
એક વ્યક્તિનો પડછાયો દેખાયો હોવાની ચર્ચાએ જોર પકડ્યું
વીડિયોમાં જોઈ શકાય છે કે, બે વ્યક્તિ કારમાં જઈ રહી છે, આ દરમિયાન ડુમ્મસ જતા પહેલા ચેક પોસ્ટ ઉપર 8થી 10 ફૂટના પડછાયા જેવું દેખાઈ રહ્યો છે. કારમાં જઈ રહેલી બે વ્યક્તિ તેનો પીછો કરી રહી છે.
ફરી ભૂતની વાત થઈ વહેતી
આ વીડિયો વાયરલ થયા બાદ ઘણા સમય પછી ફરી એક વખત ડુમ્મસ બીચ ઉપર ભૂતની વાત વહેતી થઈ છે. આપને જણાવી દઈએ કે, ડુમ્મસ બીચ સાથે ઘણી ડરામણી કહાનીઓ જોડાયેલી છે. સ્થાનિકોના જણાવ્યા અનુસાર, આ દરિયાકિનારાનો ઉપયોગ કબ્રસ્તાન તરીકે કરવામાં આવતો હતો અને તેને કારણે જ એ દરિયા કિનારાની રેતી કાળી છે. આ સાથે જ એમ પણ કહેવામાં આવે છે કે એ દરિયા કિનારે રાત્રે ઘણી આત્માઓ પણ ભટકે છે અને એટલા માટે જ એ બીચ પર રાત્રે એકલું જવાની મનાઈ છે.
ડુમ્મસ બીચનું નામ ભારતની મોસ્ટ હોન્ટેડ જગ્યાઓમાં સામેલ
જો કે, ઘણા લોકો આ વાત માનતા નથી પણ એવું કહેવામાં આવે છે કે જે લોકો આ બીચ પર રાત્રે એકલા ગયા છે એ ક્યારેય પાછા ફર્યા નથી અને તેને કારણે જ સુરતના ડુમ્મસ બીચનું નામ ભારતની મોસ્ટ હોન્ટેડ જગ્યાઓમાં સામેલ છે. રાતના સમયે આ બીચની આસપાસ કોઈ વ્યક્તિ ભટકતુ પણ નથી.