કટકી કરી? / યુનિફોર્મ વગર તોડ કરતા અમદાવાદ પોલીસકર્મીઓનો VIDEO વાયરલ, જાગૃત નાગરિકે કાયદાનું કરાવ્યું ભાન!

• સેટેલાઈટમાં પોલીસ પર આક્ષેપ
• ભ્રષ્ટાચારના લાગ્યા આક્ષેપ
• ટ્રક ચાલકનો તોડ કરવાનો કર્યો પ્રયાસ
• યુનિફોર્મ વગર કરી રહ્યા છે તોડ

કેટલાક ભ્રષ્ટ પોલીસ કર્મચારીઓના કારણે સમગ્ર પોલીસ ડિપાર્ટમેન્ટને અનેક વખત નીચા જોણું થાય છે. આવો જ એક ચકચારી બનાવ અમદાવાદના સેટેલાઈટમાં પોલીસ સ્ટેશન વિસ્તારમાં બન્યો છે. આ કથિત વાયરલ વીડિયોમાં યુનિફોર્મ વગર ઉભેલા પોલીસકર્મીઓ ટ્રક ચાલક પાસેથી તોડ કરી રહ્યા છે.ધરણીધર પુલ ઉતરતા માણેકબાગ ચાર રસ્તા પાસે આ વીડિયો પોલીસના તોડકાંડની ચાડી ખાઈ રહ્યો છે.  રેતી ભરેલા ટ્રક ચાલક પાસેથી પોલીસ કર્મીએ ખિસ્સું ગરમ કરવા રૂપિયા માંગ્યા હોવાનો આરોપ છે. જે બાદ ટ્રક ચાલક અને પોલીસકર્મી વચ્ચે રકઝક પણ થઈ હોવાનું વીડિયોમાં સ્પષ્ટ જોવા મળે છે. છેલ્લે તો વાત હાથપાઈ ઉપર ઉતરી આવે છે. 

જાગૃત નાગરિક આ વીડિયોને મોબાઈલ ફોનમાં કેદ કરે છે. વીડિયો ઊતરતો જોઈ પોલીસકર્મી તેના સાથે હાથ ચાલકી કરવામાં આવી તેવુ રટણ કરી રહ્યો છે. હાલ સોશિયલ મીડિયામાં આ વીડિયો ખૂબનો વાયરલ છે. લોકો આવા રૂપિયાના ભૂખ્યા પોલીસકર્મી પર કડક કાર્યવાહીની માંગ  કરી રહ્યા છે. વીડિયો વાયરલ થતા ઉચ્ચ પોલીસકર્મીઓએ તપાસ શરૂ કરી છે. પણ હજુ સુધી કોઈ કાર્યવાહી થઈ હોવાના સમાચાર પ્રાપ્ત થયા નથી. પણ ફરી ઘીના ઠામમાં ઘી પડશે તેવો ઘાટ ઘડાયો હોય તેવુ લાગી રહ્યું છે.