દારૂબંધી ક્યાં ? / લો બોલો, આમને ન નડે દારુબંધી! ગુજરાત ભાજપના SC મોરચાના મહામંત્રી જ વહેંચી રહ્યા છે દારું, રાજકારણ ગરમાયું

• ભાજપના હોદ્દેદારનો દારુ વેચતો વીડિયો વાયરલ
• ભાજપના SC મોરચાના મહામંત્રી ચિરાગ કડોડીયાનો વીડિયો
• વીટીવી ન્યૂઝ નથી કરતું વીડિયોની પુષ્ટિ 

શું ખરેખર ગુજરાતમાં દારુબંધી છે ખરા ?  એક દિવસ એવો હોતો નથી કે જ્યારે દારુબંધીના ધજાગરા ઉડાવતી કોઇ ઘટના સામે આવી ન હોય.  ગુજરાતમાં બેફામ દારુના અડ્ડા ધમધમે છે આવા વિપક્ષ આક્ષેપો કરી રહ્યું છે તો બીજી તરફ એવી પણ ઘટના આવે છે જ્યાં પોલીસ જ બુટલેગરોને છાવરતી હોય.  ત્યારે ભાજપ શાસિત આ રાજ્યમાં ભાજપના જ નેતા દારુબંધીના નિયમો નેવે મૂકીને બેફામ દારુનું વેચાણ કરી રહ્યા હોવાનું સામે આવ્યું છે.  

ભાજપ SC મોરચાના મહામંત્રી દારુ વેચે !

વાત છે ગુજરાત નવસારીના વાંસદા ગામની.  ગામમાં વાંસદા ભાજપના SC મોરચાના મહામંત્રી દારુ વેચતા હોય તેવો વીડિયો વાયરલ થયો છે. આ મહામંત્રીનુ નામ ચિરાગ કડોડીયા છે. જેઓ વાંસદા ગ્રામપંચાયતના સભ્ય હોવાની સાથે ભાજપ મીડિયા સેલના કન્વીનર પણ છે.  તેઓના હાથમાં દારુની બોટલ જોવા મળી રહી છે. ત્યારે ભાજપના હોદ્દેદારોનો આવો વીડિયો વાયરલ થતા ચર્ચાનો દોર શરુ થયો છે.  ત્યારે અહીં સવાલ એ થાય કે શું તમે સત્તા પક્ષના હોદ્દેદાર હોવ એટલે નિયમોનું ઉલ્લંઘન કરશો ?  કોણે તમને દારુ વેચવાવો પરવાનો આપ્યો ?  વાંસદા પોલીસ શું કરી રહી છે ?   કે પછી હોદ્દદારો સાથે પોલીસની પણ સાંઠગાંઠ છે ?   દારુનું વેચાણ કરીને ગુજરાત યુવાધનને બરબાદ કરવાનો કોણે પરવાનો આપ્યો ?  ક્યાં સુધી પોલીસ નિયમોને નેવે મુકનારને છાવરતી રહેશે ? 

વીટીવી ન્યૂઝ નથી કરતું વીડિયોની પુષ્ટિ

વાંસદા ભાજપના SC મોરચાના મહામંત્રી ચિરાગ કડોડીયાનો વીડિયો વાયરલ થતા અનેક તર્ક વિતર્ક શરુ થયા છે. વીડિયોમાં દેખાઇ રહેલો ચિરાગ ક્યાંથી લાવ્યો હશે દારુ, શું તેની પોલીસ જોડે સાંઠગાંઠ હશે..  શું ચિરાગ કડોડીયા સામે કાર્યવાહી કરવામાં આવશે ? આવા અનેક સવાલો ઉભા થઇ રહ્યા છે જો કે વીટીવી ન્યૂઝ સમગ્ર વીડિયોની કોઇ પુષ્ટિ કરતું નથી. 

 સળગતા સવાલો

• ગુજરાતમાં દારૂબંધીની વાત માત્ર કાગળો પર?
• દારૂબંધી મામલે સરકાર કેમ છે સુસ્ત?
• સરકાર દારૂબંધીનો કડક અમલ કેમ નથી કરાવતી?
• ભાજપના હોદ્દેદારો દારૂ વેચી રહ્યા છે?
• ભાજપના હોદ્દેદાર પર દારૂ અંગે કરાશે કાર્યવાહી?
• કોની રહેમ નજરથી દારૂ ગુજરાતમાં આવે છે?
• પોલીસ દારૂ મામલે કેમ નથી કરતી કાર્યવાહી?
• પોલીસને કાર્યવાહી કરતા કોણ રોકી રહ્યું છે?