NIAને એક ઈમેલ મળ્યો છે, જેમાં મુંબઈમાં આતંકી હુમલાની ધમકી આપવામાં આવી છે. જે બાદ દેશના વિવિધ શહેરોને એલર્ટ કરી દેવામાં આવ્યા છે.
મુંબઈમાં આતંકી હુમલાની ધમકી
NIAના આઈડી પર આવ્યો ધમકીભર્યો ઈમેલ
પોલીસ અને અન્ય એજન્સીઓએ હાથધરી તપાસ
મુંબઈમાં આતંકવાદી હુમલાની ધમકી આપવામાં આવી છે. NIAને ધમકીભર્યો ઈમેલ મળ્યા બાદ દેશના અલગ-અલગ શહેરોને એલર્ટ કરી દેવામાં આવ્યા છે. NIAએ આ અંગેની માહિતી મુંબઈ પોલીસને પણ છે. પોલીસ અને અન્ય એજન્સીઓ તપાસમાં લાગેલી છે.
ધમકીભર્યો ઈમેલ આવતા ખળભળાટ
સૂત્રોના જણાવ્યા અનુસાર, NIAના ઈમેલ આઈડી પર ધમકીભર્યો મેલ આવ્યો છે, જેમાં મુંબઈમાં આતંકી હુમલાની ધમકી આપવામાં આવી છે. ઈમેલ કરનારે પોતાને તાલિબાની ગણાવ્યો છે અને દાવો કર્યો છે કે તાલિબાન સંગઠનના અગ્રણી નેતા સિરાજુદ્દીન હક્કાનીના આદેશ પર આવું થવા જઈ રહ્યું છે.
દેશના અલગ-અલગ શહેરોમાં એલર્ટ
ધમકીભર્યા ઈમેલની માહિતી મળતાની સાથે જ મુંબઈ પોલીસને તેની જાણ કરવામાં આવી છે. હાલ પોલીસ અને અન્ય એજન્સીઓ તપાસ કરી રહી છે અને ઈમેલ ક્યાંથી મોકલવામાં આવ્યો હતો તે શોધવાનો પ્રયાસ કરી રહી છે. સાથે જ દેશના અલગ-અલગ શહેરોમાં એલર્ટ જારી કરવામાં આવ્યું છે.
કોણ છે સિરાજુદ્દીન હક્કાની?
સિરાજુદ્દીન હક્કાની તાલિબાનના સૌથી ખતરનાક જૂથ હક્કાની નેટવર્કનો વડો છે. અફઘાનિસ્તાનમાં તાલિબાનની વાપસી બાદ તેને કાર્યકારી ગૃહમંત્રી બનાવવામાં આવ્યો છે. તાલિબાનમાં હક્કાની નેટવર્કનો નોંધપાત્ર પ્રભાવ છે. અમેરિકન તપાસ એજન્સી એફબીઆઈએ હક્કાનીના લોકેશનની જાણકારી માટે $10 મિલિયનનું ઈનામ રાખ્યું છે.
મુંબઈના પ્રખ્યાત માઉન્ટ મેરી ચર્ચને મળ્યો હતો ધમકીભર્યો ઈમેલ
નોંધનીય છે કે, આ પહેલા મુંબઈના સૌથી હાઈપ્રોફાઈલ વિસ્તારો પૈકીના એક બાંદ્રા વિસ્તારમાં આવેલા પ્રસિદ્ધ માઉન્ટ મેરી ચર્ચને એક ધમકીભર્યો ઈમેલ મળ્યો હતો. સૂત્રોએ જણાવ્યું હતું કે, 'આ મેઇલ [email protected] નામના એકાઉન્ટ પરથી આવ્યો હતો. ઈમેલમાં લખવામાં આવ્યું છે કે લશ્કર-એ-તૈયબા નામનું આતંકવાદી સંગઠન માઉન્ટ મેરી ચર્ચ પર આતંકવાદી હુમલો કરવા જઈ રહ્યું છે.'