દરોડો / અમદાવાદમાં ખૂણેખાંચરે દારૂ-જુગારના અડ્ડા: SMCની એક જ સ્થળે ત્રણ મહિનામાં ત્રણ રેડ છતાં સ્થાનિક પોલીસની ‘આંખે પાટા’

• SMCની એક જ સ્થળે ત્રણ મહિનામાં ત્રણ રેડ છતાં સ્થાનિક પોલીસની ‘આંખે પાટા’ 
• રપ જુગારીઓ ૧૧.૧૭ લાખના મુદ્દામાલ સાથે પકડાયા
• સ્થાનિક પોલીસની પોલ ખુલ્લી પડી

અમદાવાદમાં ખૂણેખાંચરે દારૂ-જુગારના અડ્ડા ધમધમી રહ્યા છે, જેના પર અનેક વખત સ્થાનિક પોલીસ, ક્રાઇમ બ્રાંચ, પ્રિવેન્શન ઓફ ક્રાઇમ બ્રાંચ (પીસીબી), સ્ટેટ મો‌િનટરિંગ સેલ (એસએમસી), લોકલ ક્રાઇમ બ્રાંચ (એલસીબી) રેડ કરીને કાર્યવાહી કરતાં હોય છે. આજે સ્ટેટ મોનિટરિંગ સેલની ટીમે દાણીલીમડા વિસ્તારમાં ચાલતા જુગારના અડ્ડા પર દરોડા પાડ્યા, જેમાં રપ જુગારીઓને ૧૧.૧૭ લાખના મુદ્દામાલ સાથે ઝડપી પાડ્યા હતા. સમગ્ર ઘટનામાં ચોંકાવનારી વાત એ છે કે સ્ટેટ મોનિટરિંગ સેલની ટીમે એક જ જગ્યા પર ચાલતા જુગારધામ પર ત્રણ મહિનામાં ત્રીજી વખત રેડ કરી છે, જેના કારણે સ્થાનિક પોલીસની પોલ ખુલ્લી પડી છે.

સ્ટેટ મોનીટરીંગ સેલ દ્વારા તા.૨૨/૦૩/૨૦૨૩ના રોજ #Ahmedabad દાણીલીમડા પો.સ્ટે. વિસ્તાર ખાતે જાણીતા જુગારી અમરતભાઈ ખોડાભાઇ રબારીના જુગારના અડ્ડા પર દરોડો જેમાં રોકડ રૂ.૧.૦૨ લાખ તથા અન્ય મળી કુલ રૂ. ૧૧.૧૭ લાખનો મુદ્દામાલ સાથે પકડાયેલ ૨૫ આરોપીઓ તથા વોન્ટેડ ૦૧ આરોપી વિરુદ્ધ ગુનો દાખલ pic.twitter.com/ehEEECR8wX

— SMC Gujarat (@smcgujarat) March 22, 2023

પોલીસના પ્લાન સામે જુગારી ભાગવામાં નિષ્ફળ 
  
સ્ટેટ મોનિટરિંગ સેલની ટીમને બાતમી મળી હતી કે દાણીલીમડા વિસ્તારમાં આવેલા આંબેડકર‌િબ્રજ પાસે ખો‌િડયારનગરના છાપરામાં અમરત રબારીએ ફરીથી જુગારનો અડ્ડો ચાલુ કરી દીધો છે. બાતમીના આધારે એસએમસીની ટીમે ફરીથી પ્લાન બનાવીને રેડ કરવાનું નક્કી કરી લીધું હતું અને તરત જ ઘટનાસ્થળે પહોંચી ગયા હતા. એસએમસીની રેડ થતાંની સાથે જ અફરાતફરીનો માહોલ સર્જાયો હતો, પરંતુ પોલીસનો પ્લાન એટલો મજબૂત હતો કે કોઈ પણ જુગારી ભાગવામાં નિષ્ફળ રહ્યા હતા. સ્ટેટ મોનિટરિંગ સેલની ટીમે રપ જુગારીઓની ૧૧.૧૭ લાખ રૂપિયાના મુદ્દામાલ સાથે ધરપકડ કરી છે. 

ત્રીજી રેડમાં એસએમસીની ટીમે રપ જુગારીઓને ઝડપી પાડ્યા

પોલીસે જુગારીઓ પાસેથી એક લાખની રોકડ, ૩.૭૮ લાખના ર૬ મોબાઇલ ફોન, ૬.૩પ લાખનાં ૧૪ વાહનો જપ્ત કર્યાં છે.  ઉલ્લેખનીય છે કે સ્ટેટ મો‌િનટરિંગ સેલની ટીમે તારીખ ૧૦ જાન્યુઆરીના રોજ ખો‌િડયારનગરમાં જુગારના અડ્ડા પર દરોડા પાડ્યા હતા, જેમાં ૧૧ જુગારીઓની ધરપકડ થઇ હતી. એસએમસીની રેડ બાદ પણ ફરીથી જુગારધામ શરૂ થતાં સ્થાનિક પોલીસની કામગીરી પર સવાલ ઊભા થયા હતા. રેડના ૧પ દિવસમાં એક જ જગ્યા પર એસએમસીની ટીમે બીજી વખત જુગારધામ ઝડપી પાડ્યું છે, જેમાં ૧પ જુગારીઓ ઝડપાયા હતા. બે વખત એસએમસીએ દરોડા પાડ્યા બાદ મોડી રાતે ફરીથી તે જ જગ્યા પર એસએમસીએ સપાટો બોલાવ્યો હતો. ત્રીજી રેડમાં એસએમસીની ટીમે રપ જુગારીઓને ઝડપી પાડ્યા હતા.  

કુખ્યાત અમરત રબારીને આખરે કોના આશીર્વાદ?

સામાન્ય રીતે એસએમસીની રેડ થાય ત્યાં કોઇ પણ બુટલેગર અને જુગારનો અડ્ડો ચલાવનાર આરોપી ફરીથી ધંધો કરવાનો દસ વખત વિચાર કરે છે. અમરત રબારીના અડ્ડા પર જાન્યુઆરીમાં બે વખત દરોડા પાડ્યા હતા, જેમાં ર૬ જુગારીઓ ઝડપાયા હતા, જ્યારે આજે એસએમસીએ દરોડા પાડી રપ જુગારીઓને ઝડપી પાડ્યા છે. ચોંકાવનારી વાત એ છે કે અમરત રબારીના અડ્ડા પર સ્ટેટ મો‌િનટરિંગ સેલની ટીમે ત્રણ વખત મોટી સંખ્યામાં જુગારીઓને ઝડપી પાડ્યા છે તેમ છતાંય સ્થાનિક પોલીસ તેમજ ઉચ્ચ અધિકારીઓના પેટનું પાણી હાલતું નથી. સામાન્ય રીતે બીજી એજન્સીઓ દારૂ કે જુગારનો અડ્ડો ઝડપી પાડે તો પોલીસ કમિશનર સ્થાનિક પોલીસ સ્ટેશનના પીઆઇ તેમજ પીએસઆઇ સહિતના કર્મચારીઓને સસ્પેન્ડ કે ટ્રાન્સફર કરી દેતા હોય છે, પરંતુ દાણીલીમડા પોલીસ સ્ટેશનના પીઆઇ તેમજ કર્મચારીઓ વિરુદ્ધ કાર્યવાહી નહીં થતાં અમરત રબારીને કોના આશીર્વાદ છે તે મામલે ચર્ચાએ જોર પકડ્યું છે.

મોબાઇલ જમા લઈ લેવામાં આવતા
હાઇપ્રોફાઇલ જુગારધામ અમરત રબારીના ઇશારે ચાલી રહ્યું છે, જેનું સંચાલન મોહંમદ રફીક કરી રહ્યો છે, જ્યારે પણ કોઇ પણ જુગારી રમવા માટે આવે ત્યારે પહેલાં તેમનો મોબાઇલ જમા લઈ લેવામાં આવતો હતો. ત્યાર બાદ જુગારી રૂપિયા આપે તે પ્રમાણે કોઇન આપવામાં આવતા હતા. જુગારીઓને નાસ્તો તેમજ ચા-પાણી કોલ્ડડ્રિન્ક અડ્ડા ઉપર જ પ્રોવાઇડ કરવામાં આવતું હતું. કસીનોમાં જેવી રીતે રૂપિયા જમા કરાવીને કોઇન મળે છે તેવી જ રીતે મોહંમદ રફીક પણ રૂપિયા લઇને કોઇન જુગારીને આપતો હતો. આખો દિવસ અને રાત જુગારનો અડ્ડો ચાલી રહ્યો હતો.