વડોદરામાં ધોરણ 10માં અભ્યાસ કરતી વિદ્યાર્થિનીએ ગળેફાંસો ખાઈ જીવન ટૂંકાવ્યું છે. પરિવારે જણાવ્યું કે, પરીક્ષા આપ્યા બાદથી જ વિદ્યાર્થિની ગુમસુમ રહેતી હતી.
વડોદરામાં વિદ્યાર્થિનીનો આપઘાત
ગળેફાંસો ખાઈને જીવન ટૂંકાવ્યું
ધોરણ 10માં કરતી હતી અભ્યાસ
રાજ્યભરમાં આપઘાતના બનાવો સતત વધી રહ્યા છે. આ દરમિયાન વધુ એક આપઘાતનો બનાવ સામે આવ્યો છે. આજે વડોદરામાં ધોરણ 10માં અભ્યાસ કરતી વિદ્યાર્થિનીએ આપઘાત કરી લેતા ચકચાર મચી ગઈ છે. હાલ પોલીસ આ મામલે તપાસ કરી રહી છે.
માંજલપુર પોલીસ દોડી આવી
મળતી માહિતી અનુસાર, વડોદરાના માંજપુર વિસ્તારમાં રહેતી પ્રિયા જોશી નામની ધોરણ 10ની વિદ્યાર્થિનીએ પોતાના ઘરે ગળે ફાંસો ખાઈને જીવન ટૂંકાવ્યું હતું. આ અંગેની જાણ પોલીસને કરતા માંજલપુર પોલીસની ટીમ ઘટનાસ્થળે દોડી આવી હતી. પોલીસે યુવતીના મૃતદેહને પોસ્ટમોર્ટમ અર્થે હોસ્પિટલ ખાતે ખસેડીને પરિવારજનોની પૂછપરછ હાથ ધરી હતી.
'પરીક્ષા આપ્યા બાદથી જ મૂંઝવણમાં રહેતી હતી વિદ્યાર્થિની'
પોલીસની પૂછપરછમાં મૃતક વિદ્યાર્થિનીના પરિવારજનોએ જણાવ્યું કે, પ્રિયાએ તાજેતરમાં જ ધોરણ 10ની બોર્ડની પરીક્ષા આપી હતી. પરીક્ષા આપ્યા બાદથી જ પ્રિયા મૂંઝવણમાં રહેતી હતી. હાલ માંજલપુર પોલીસે આપઘાતનો ગુનો નોંધી વધુ તપાસ હાથ ધરી છે.