બનાસકાંઠામાં 38 વરસ અગાઉ ચોરાયેલી ગાડી મૂળ માલિકને પરત મળી છે. જેનું કારણ એ હતું કે જે વ્યકિતએ ગાડી ચોરી હતી તેના પૌત્રએ ઘરમાં સુખ અને શાંતિ બની રહે તે માટે ગાડી મૂળ માલિકને પરત આપતા સમગ્ર પંથકમાં કુતૂહલ સર્જાયું હતુ. જીપ માલિકા પણ જીપ લઈને આવનારા દંપત્તિ અને તેમના પુત્રને સન્માન સાથે પરત મોકલ્યા હતા.
સામાન્ય રીતે ચોરાયેલી વસ્તુ પાછી મળવાની શક્યતાઓ નહિવત જેવી હોય છે પરંતુ બનાસકાંઠામાં ચોરાયેલી ગાડી 38 વર્ષ બાદ પછી મળી હોવાની અજીબ ઘટના સામે આવી છે અને તે પણ ચોરી કરનારના પૌત્રએ ગાડી મૂળ માલિકને પરત આપી.
સમગ્ર ઘટના વિશે જણાવીયે તો લાખણી તાલુકાના ચાળવા ગામમાં રહેતા સુરેશભાઈ સોનીની વર્ષ 1985-86માં ઘર પાસે પાર્ક કરેલી જીપ રાત્રિના સમયે અજાણ્યા શખ્સો ઉઠાંતરી કરી નાસી છૂટ્યા હતા. આ અંગે સુરેશભાઈ દ્વારા ગાડી પરત આવી જવાની શ્રદ્ધા સાથે ગામમાં આવેલ ગોગા મહારાજના મંદિરે બાધા રાખી ગાડીની શોધખોળ કરી હતી.
જો કે ગાડીના મળતા કેટલાક મહિનાઓ બાદ જીપને ભૂલી ગયા હતા. બાદમાં આ ઘટનાના 38 વર્ષના લાંબા સમયગાળા બાદ જીપ ચોરી કરનારના પૌત્રએ પોતાના પરિવારમાં સુખ-શાંતિ બની રહે તે હેતુ સર અને પરધન પથ્થર માની તેમના દાદા દ્વારા આ ચોરી કરાયેલી ગાડી તેના મૂળ માલિક સુરેશભાઈને ચાળવા ગામે આવીને પરત કરતા સમગ્ર પંથકમાં કુતૂહલ સર્જાયું હતું.
જીપ ગામમાં આવતા લોકો પણ તેને જોવા આવ્યા હતા. સુરેશભાઈના પરિવાર દ્વારા ગાડીનું પૂજન કરી વાજતે ગાજતે સ્વાગત કરવામાં આવ્યું હતું. દાદાએ ચોરી કરેલી જીપને પૌત્ર દ્વારા પરત કરવાની આ ઘટનાએ સમગ્ર પંથકમાં ચર્ચાનું કેન્દ્ર બની હતી ત્યારે 35 વર્ષ બાદ ગાડી પરત મળતા સુરેશભાઈના પરિવારમાં અચરજની સાથે ખુશી છવાઈ ગઈ હતી.