કારગિલ પહોંચેલા વડાપ્રધાન સાથે મેજર અમિત કુમારે મુલાકાત કરી હતી અને પીએમ મોદીને એક તસવીર ભેટમાં આપી હતી. આ તસવીર જોઈને પીએમ મોદી ખૂબ જ ભાવુક થઈ ગયા હતા.
PM નરેન્દ્ર મોદી દિવાળીના ખાસ અવસર પર કારગિલ પહોંચ્યા
ભારતીય સેનાના જવાનો સાથે દિવાળીની ઉજવણી કરી
મેજર અમિત કુમારે PM મોદીને ભેટમાં તસવીર આપી
PM મોદી અને જવાનની ખાસ તસવીર થઈ વાયરલ
દેશમાં આજે દિવાળીનો તહેવાર મનાવવામાં આવી રહ્યો છે. ત્યારે દર વર્ષની જેમ આ વર્ષે પણ સેનાના જવાનો સાથે વડાપ્રધાન નરેન્દ્ર મોદીએ દિવાળીની ઉજવણી કરી. આ વખતે જવાનો સાથે દિવાળીના તહેવારની ઉજવણી કરવા માટે પીએમ મોદી કારગિલ પહોંચ્યા હતા. અહીં પીએમ મોદીએ સેનાના જવાનો સાથે દિવાળીની ઉજવણી કરી હતી. આ દરમિયાન જવાનો ખૂબ જ ઉત્સાહિત અને ખુશ જોવા મળ્યા હતા. તેઓએ વડાપ્રધાન મોદીની સાથે ફોટા પણ પડાવ્યા હતા. આ વખતે કારગિલ પહોંચેલા વડાપ્રધાને જવાનોને મીઠાઈ ખવડાવીને તહેવારની ઉજવણી કરી હતી. વડાપ્રધાનને પોતાની વચ્ચે જોઈને સેનાના જવાનોમાં અનેરો ઉત્સાહ જોવા મળ્યો હતો.
એક તસવીર જોઈને ભાવુક થઈ ગયા PM મોદી
પીએમ મોદીના આગમનની ખુશીમાં ભારતીય સેનાના જવાનોએ દેશભક્તિના ગીતો પણ ગાયા હતા. પીએમ મોદીએ પણ તાળીઓના ગડગડાટથી તેમનું અભિવાદન કર્યું હતું. આ તકે સેનાના એક મેજરે પીએમ મોદીને એક તસવીર ભેટમાં આપી, જેને જોઈને વડાપ્રધાન નરેન્દ્ર મોદી ખૂબ જ ભાવુક થઈ ગયા હતા. કારગિલ ખાતે ફરજ બજાવતા મેજર અમિત કુમારે દિવાળીની ઉજવણી કરવા આવેલા પીએમ મોદી સાથે મુલાકાત કરી હતી અને તેમને તસવીર આપી હતી. PM મોદી અને જવાનની ખાસ તસવીર સોશિયલ મીડિયા ખૂબ વાયરલ થઈ રહી છે.
મેજર અમિત કુમારે 2001માં PM મોદી સાથે કરી હતી મુલાકાત
મેજર અમિત કુમારે PM મોદીને આપેલી આ તસવીરમાં નરેન્દ્ર મોદીની સાથે કેટલાક બાળકો જોવા મળી રહ્યા છે. વાસ્તવમાં મેજર અમિત કુમારે નવેમ્બર 2001માં ગુજરાતના બાલાચડીમાં એક સૈનિક સ્કૂલમાં પીએમ મોદી સાથે મુલાકાત કરી હતી. ત્યારે તેઓ ઘણા નાના હતા.એ સમયે તેઓ વિદ્યાર્થી હતા. અત્યારે તેઓ આર્મીમાં મેજર તરીકે ફરજ બજાવી રહ્યા છે. તેઓએ 21 વર્ષ પહેલા નરેન્દ્ર મોદી સાથે મુલાકાત કરી હતી. હાલ પીએમ મોદી અને અમિત કુમારની આ તસવીર સોશિયલ મીડિયામાં વાયરલ થઈ છે.