Cyber Crime News: અલગ-અલગ બનાવટી એપ્લિકેશન પરથી લોન લેતા લોકો માટે ચેતવણીરૂપ કિસ્સો સામે આવ્યો છે. ફરિયાદીએ લોન ન ભરતા ફરિયાદીના મોર્ફ્ડ ફોટા વાયરલ કર્યો હતો.
એપ્લિકેશન પરથી લોન લેતા સાચવજો!
1.62 લાખની લોન સામે 2.48 લાખ ભર્યા
મેસેજ અને વોટ્સએપ કોલ કરી ધાકધમકી આપી
મોર્ફ્ડ ફોટા તેનાં સગાં સંબંધીને ઠગબાજોએ મોકલ્યા
અમદાવાદના વાસણામાં રહેતા વેપારીએ ફેસબુક પર જાહેરાત જોઈ ઓનલાઇન એપમાંથી 1.62 લાખની લોન લીધા બાદ 2.48 લાખની રકમ ભરી દીધી હતી. તેમ છતાં થોડા દિવસ બાદ તેને મેસેજ અને વોટ્સએપ કોલ કરી ધાકધમકી આપી વેપારીના મોર્ફ્ડ ફોટા તેનાં સગાં સંબંધીને ઠગબાજોએ મોકલ્યા હતા.
એપ્લિકેશનમાંથી લીધી હતી 1.63 લાખની લોન
વાસણામાં રહેતા અને ત્રણ દરવાજા પાસે કપડાંની દુકાન ધરાવતા જિનલ પંચાલે થોડા દિવસ પહેલાં ફેસબુક ઉપર તરત ઇઝી લોન નામની જાહેરાત જોઈ તેનાં પર ક્લિક કરતાં એક ફોર્મ ખુલ્યું હતું. જિનલે તેમાં પોતાની તમામ પર્સનલ વિગતો ભરી હતી. એક દિવસ પછી તેને અજાણ્યા મોબાઈલ નંબરથી ટેક્સ્ટ મેસેજ આવ્યો હતો કે યોર લોન ઈસ પ્રોસેસ, પ્લીઝ ક્લિક ઓન લિંક. જિનલે લિંક ક્લિક કરતાં એક વેબપેજ ખુલ્યું હતું અને તેમાં નામની અલગ અલગ એપ હોવાથી જિનલે તમામ એપ ડાઉનલોડ કરી હતી. ટુકડે ટુકડે જિનલે 1.63 લાખની લોન લીધી હતી.
2.48 લાખ ભર્યા છતાં અપાતી હતી ધમકી
જિનલે 2.48 લાખ લોન ભરપાઈ કરી દીધી હતી, છતાં થોડા દિવસ બાદ તેને અલગ અલગ મોબાઈલ નંબર પરથી વોટ્સએપ કોલ અને મેસેજ કરી ધમકી મળતી હતી કે કેસ આપો નહીં તો તમારા ન્યૂડ ફોટા વાઈરલ કરી દઈશું.
સાયબર ક્રાઈમમાં નોંધાવી ફરિયાદ
લોન ભરી દીધી હતી છતાં જિનલના મિત્રો અને સગાં સંબંધીઓને જિનલના મોર્ફ્ડ ન્યૂડ ફોટા મોકલ્યા હતા. આથી જિનલે સાયબર ક્રાઇમ પોલીસ સ્ટેશનમાં ફરિયાદ નોંધાવી હતી. પોલીસ સ્ટેશનમાં ફરિયાદના આધારે તપાસ શરૂ કરી છે.