ચકચાર / ગુજરાતમાં બની ચોંકાવનારી ઘટના, જાતે મુરતિયો શોધ્યો તો દાદાએ પૌત્રી સાથે જુઓ શું કર્યુ

• ગુજરાતમાં વધુ એક લાંછન લગાડતી ઘટના
• 20 વર્ષની યુવતીને પોતાના દાદાએ ખેતરમાં ગોંધી રાખી
• 181 મહિલા હેલ્પલાઇનની ટીમ કરી મદદ

પ્રાપ્ત થતી જાણકારી પ્રમાણે, આણંદ જિલ્લામાંથી રાત્રે 11 વાગ્યાની આસપાસ એક 20 વર્ષની યુવતીનો ફોન 181 મહિલા હેલ્પલાઇનના નંબર પર આવ્યો. જેમાં રડતા રડતા યુવતીએ પોતાની આપવીતી જણાવેલ કે, મને મારા દાદાએ ઘરમાં પૂરી દીધેલી છે. 

ખેતરમાં ઘર હોવાથી મહિલા હેલ્પલાઇનની ટીમ 3 ખેતર ખૂંદી વળી

યુવતી સાથે વાતચીત કર્યા બાદ તાત્કાલિક અસરથી મહિલા હેલ્પલાઇનની વાન ઘટના સ્થળે પહોંચી. ગાડી વધુ અંદર જઇ શકે તેમ ન હોવાથી રસ્તા પર જ ઉભી રાખવામાં આવી અને કેટલાક લોકોને પૂછતા-પૂછતા ટીમ 3 ખેતર ચાલી અને પીડિતાના દાદાનું સરનામું શોધી કાઢ્યું. જો કે, દાદાની પૂછપરછ કરાતા પહેલા તો તેમણે સહકાર ન આપ્યો અંતે હેલ્પલાઇનના કર્મચારીઓ દ્વારા કડક શબ્દોમાં પૂછપરછ કરતા જે ખેતરમાં આવેલ ઘરમાં યુવતીને ગોંધી રાખવામાં આવી હતી. ત્યાંનો રસ્તો બતાવ્યો અને હેલ્પલાઇનની ટીમ જ્યારે તે ઘરે પહોંચી તો ત્યાં યુવતીનો રડવાનો અવાજ સંભળાઇ રહ્યો હતો. 

પિતાના નિધન બાદ પોતના ઘરમાં એકલી રહેતી હતી યુવતી 

ઘટના સ્થળે આવી પહોંચેલી મહિલા હેલ્પલાઇનની ટીમે દરવાજાની તિરાડમાંથી છોકરી દેખાતા દરવાજો ખોલી નાંખેલ.  દરવાજો ખોલતા જ યુવતીએ દોડીને કાઉન્સિલરને ભેટી પડેલ. યુવતી શાંત પડ્યા બાદ તેની પૂછપરછ કરાતા તેણીએ જણાવ્યું કે, તે જ્યારે જન્મી ત્યારે જ તેની માતા મૃત્યુ પામી હતી અને ત્યારબાદ પિતાએ બીજા લગ્ન કરેલ. પરંતુ કુટુંબીજનોના ત્રાસથી તે મહિલા પણ પિતાને છોડીને ચાલી ગયેલ. ત્યારબાદ પિતાએ જ દીકરીની સાર-સંભાળ રાખેલ. 

યુવતીના દાદાએ જ ખેતરમાં ગોંધી રાખી 

પરંતુ 4 વર્ષ પહેલાં દીકરીના પિતા પણ મૃત્યુ પામતા યુવતી એકલી ઘરમાં રહેતી હતી અને સરકારી સહાયથી 12 ધોરણ સુધીનું ભણતર પૂરું કર્યું હતું. ત્યારબાદ આ યુવતીએ કુટુંબમાં પોતાના માટે સારું સગપણ શોધવા જણાવેલ પરંતુ કોઈએ ધ્યાન નહીં આપતા અંતે યુવતીએ જાતે જ છોકરો શોધીને લગ્ન કરી લીધા હતા. તેના આ લગ્ન વિશેની ખબર પડતા યુવતીના દાદાએ તેને ખેતરમાં આવેલ એક ઘરમાં ગોંધી રાખી હતી અને જણાવ્યું કે, સામે બોલશે તો તેને દૂર પરણાવી દઇશું. 

મહિલા હેલ્પલાઇનની ટીમે યુવતીને આશ્રય ગૃહને સોંપી 

ઉલ્લેખનીય છે કે, યુવતીની આ વેદના સાંભળ્યા બાદ સગાને નહીં સોંપતા મહિલા હેલ્પલાઇનની ટીમે આશ્રય ગૃહને સોંપી હતી. એક તરફ આપણે ત્યારે દીકરી બચાવો દીકરીને ભણાવોની વાત કરવામાં આવી રહી છે ત્યારે આ પ્રકારે બનતી ઘટનાઓ મહિલાઓની સલામતી સામે સવાલ ઉભા કરી જાય છે.