રાજકોટના જામકંડોરણામાંથી હચમચાવી દેનારી ઘટના સામે આવી છે, પતિએ મિત્રો સાથે મળીને પત્ની ઉપર સામૂહિક દુષ્કર્મ આચરી હત્યા કરી દેવામાં આવતા પોલીસે પતિ સહિત ત્રણ શખ્સોની ધરપકડ કરી છે.
જામકંડોરણામાં પતિ જ બન્યો પત્નીનો હત્યારો
પતિએ મિત્રો સાથે મળીને પત્ની ઉપર સામૂહિક દુષ્કર્મ આચર્યું
પોલીસે કડકાઈથી પૂછપરછ કરતા ભાંડો ફૂટ્યો
જામકંડોરણાની વાડીમાં રહીને મજૂરી કામ કરતી આદીવાસી મહિલાને માથામાં ગંભીર ઇજા સાથે હોસ્પિટલમાં ખસેડવામાં આવી હતી. જ્યાં સારવાર મળે તે પહેલા જ તેનું મોત નીપજ્યું હતું. મહિલાના પરિવારજનોએ તેના પતિ પર હત્યાનો આરોપ લગાવતા પોલીસે મૃતદેહને ફોરેન્સિક પોસ્ટમોર્ટમ માટે સિવિલ હોસ્પિટલમાં ખસેડ્યો હતો. જે બાદ પોલીસે પતિની શંકાના આધારે અટકાયત કરી કડકાઈથી પૂછપરછ કરતા ચોંકાવનારો ખુલાસો થયો છે.
પતિ જ બન્યો પત્નીનો હત્યારો
પોલીસની આકરી પૂછપરછમાં સામે આવ્યું છે કે, પતિએ મિત્રોની સાથે મળીને પત્ની ઉપર પહેલા સામૂહિક દુષ્કર્મ આચર્યું હતું અને પત્નીના માથાના ભાગે બોથડ પદાર્થના ઘા ઝીંકી હત્યા નીપજાવી હતી. દુષ્કર્મ આચર્યા બાદ બબાલ થતા પતિએ પત્નીને મોતને ઘાટને ઉતારી દીધી હતી. હાલ પતિ સહિત ત્રણ આરોપીને જેલના સળિયાની પાછળ ધકેલી દેવામાં આવ્યા છે.
સારવાર મળે તે પહેલા નીપજ્યું મોત
મળતી માહિતી અનુસાર, મૂળ મધ્યપ્રદેશના બાવાની ગામના દલકીબેનના લગ્ન કિશન બામણીયા સાથે થયા હતા. તેમને સંતાનમાં 2 દીકરી અને 3 દીકરા છે. ગત રોજ દલકી કિશન બામણીયાને માથામાં ગંભીર ઇજા થતાં તેમને બેભાન હાલતમાં જામકંડોરણા હોસ્પિટલમાં ખસેડવામાં આવ્યા હતાં. જ્યાં તેમનું સારવાર મળે તે પહેલા જ મોત નીપજ્યું હતું.
પરિવારજનોએ વ્યક્ત કરી શંકા
જે બાદ મહિલાના પરિવારજનોએ પતિએ દલકીબેનની હત્યા કરી હોવાની શંકા વ્યક્ત કરી હતી. જેના કારણે પોલીસે મહિલાના મૃતદેહને પોસ્ટમોર્ટમ અર્થે રાજકોટ ખસેડ્યો હતો અને પતિની અટકાયત કરી પૂછપરછ હાથ ધરી હતી.