ચેતજો / ઓનલાઈન ગેમ રમતા બાળકોના વાલીઓ માટે લાલબત્તી સમાન કિસ્સો, અંકલેશ્વરની સગીરા સાથે જે બન્યું તે જાણીને ધ્રૂજી જશો

• ફ્રી ફાયર-પબજી જેવી ગેમના રવાડે ચઢેલા યુવાનો માટે ચેતવણી
• ઓનલાઈન ગેમના માધ્યમથી સંપર્ક કરીને સગીરાને ભગાડી ગયો યુવક
• પોલીસે ટેક્નિકલ સર્વેલન્સના આધારે યુવતીને છોડાવી

અંકલેશ્વરની ધોરણ 10માં અભ્યાસ કરતી એક સગીરા ફ્રી ફાયર-પબજી જેવી ગેમના માધ્યમથી પશ્ચિમ બંગાળના શખ્સ અસદુલ અપચાર ગાજી સાથે સંપર્કમાં આવી હતી. જે બાદ આરોપી પશ્ચિમ બંગાળથી અંકલેશ્વર આવીને લલચાવી ફોસલાવી ભગાડી લઇ ગયો હતો. જો બાદ સગીરાના માતા-પિતાએ અંકલેશ્વર શહેર પોલીસ મથકમાં યુવક સામે ગુનો નોંધાવ્યો હતો. સગીરાના માતા-પિતાની ફરિયાદના આધારે પોલીસ તપાસનો ધમધમાટ શરૂ કર્યો હતો.  

ટ્રેનમાંથી ઝડપાયો આરોપી અને સગીરા

આ મામલે અંકલેશ્વર શહેર પોલીસ સ્ટેશનના પોલીસ ઇન્સપેક્ટર આર.એચ. વાળાએ જણાવ્યું કે,  તપાસ દરમિયાન હ્યુમન ઇન્ટેલીજન્સ તથા ટેકનીકલ સર્વેલન્સથી આરોપીની માહિતી મેળવી સદર આરોપી આ સગીરાને હાવડા સુપરફાસ્ટ ટ્રેન મારફતે વેસ્ટ બંગાળ લઇ જઇ રહ્યા હોવાનું માલુમ પડ્યું હતું. જે બાદ પોલીસે તાત્કાલિક જ રેલવે પોલીસને સગીરાના ફોટા મોકલ્યા હતા. જેથી આરપીએફએ ખડકપુર ખાતેથી ચાલતી ટ્રેનમાંથી સગીરા અને આરોપીને ઝડપી પાડ્યો હતો. 

ટીમને મોકલવામાં આવી ખડકપુર

જે બાદ અંકલેશ્વરથી એક ટીમને પશ્ચિમ બંગાળના ખડકપુર ખાતે મોકલીને સગીરાને આરોપીને પોલીસ સ્ટેશન ખાતે લાવવામાં આવવ્યા હતા. સગીરાનું કાઉન્સેલીંગ કર્યા બાદ તેના માતા-પિતાને સોંપાવામાં આવી હતી. તો આરોપીને જેલના સળીયાની પાછળ ધકેલી દેવામાં આવ્યો છે.