ક્રાઇમ / 'ફર્ઝી વેબ સિરીઝ' જોઇને અમદાવાદના યુવાનોએ અપનાવ્યો શોર્ટકટ, હોટલમાં રૂમ રાખી નકલી નોટો છાપી કાઢી

• હોટલમાં રૂમ રાખી નકલી ચલણી નોટ છાપવાના કૌભાંડનો પર્દાફાશ
• 500ના દરની 70 અને 100ના દરની ચાર ચલણી નોટ મળી આવી 
• સંજય શર્મા પાસેથી 500ના દરની 70 અને 100ના દરની ચાર નોટ મળી આવી

ફરઝી વેબ સિરીઝ જોઈને ટૂંક સમયમાં પૈસા કમાવવા નકલી નોટો છાપવાનો પર્દાફાશ થયો છે. હોટલમાં ભાડે રૂમ રાખી નકલી નોટો છાપનાર 3 આરોપીની ધરપકડ કરાઈ છે. પોલીસે 500 અને 100 રૂપિયાના દરની નકલી નોટ જપ્ત કરી છે. પોલીસે સંજયની રૂમમાંથી ધરપકડ કરી ત્યારે તેની પાસેથી પ્રિન્ટર, એ-4 સાઇઝના પેપર, ફૂટપટ્ટી, કટર તેમજ વિવિધ મુદ્દામાલ જપ્ત કર્યો હતો. સંજય એ-4 સાઇઝના પેપરમાં નકલી ચલણી નોટ પ્રિન્ટ કરતો હતો. પોલીસે તમામની ધરપકડ કરીને ચલણી નોટ છાપવાનું કામ કોની પાસેથી શીખ્યા તેની સઘન પૂછપરછ શરૂ કરી છે.     

દેશના અર્થતંત્રને ખોખલું કરવા માટે બાંગ્લાદેશ તેમજ પાકિસ્તાનથી નકલી ચલણી નોટ ઘુસાડવામાં આવી રહી છે, જેનો પર્દાફાશ અનેક વખત અલગ અલગ રાજ્યોની પોલીસ તેમજ સુરક્ષા એજન્સીઓ કરતી હોય છે, પરંતુ ભારતમાં પણ કેટલાક એવા લોકો છે, જે શોર્ટકટથી રૂપિયા કમાવવા માટે નકલી ચલણી નોટ છાપી રહ્યા છે. ગઈકાલે નરોડા વિસ્તારમાં આવેલી પાલવ હોટલમાં નકલી ચલણી નોટ છાપવાના કૌભાંડનો પર્દાફાશ થયો છે. ભણવાની ઉમરે યુવક નકલી નોટ બનાવવાના ધંધામાં આવી ગયો હતો, જેના કારણે હવે તેને જેલના સ‌િળયા પાછળ જવાના દિવસો આવી ગયા છે. હોટલનો રૂમ ભાડે રાખીને યુવક 100 તેમજ 500ના દરની નકલી ચલણી નોટ છાપી રહ્યો હતો. સરદારનગર પોલીસે ત્રણ આરોપીઓની ધરપકડ કરી છે. હોટલમાં રૂમ ભાડે રાખીને નકલી ચલણી નોટ છાપતા હોવાનું સામે આવ્યું છે. 

500ના દરની 70 અને 100ના દરની ચાર ચલણી નોટ મળી આવી 
સરદારનગર પોલીસ સ્ટેશનના પીએસઆઇ આર.વી.ચીહલા સહિતની ટીમને બાતમી મળી હતી કે નરોડા મહાપ્રભુજીની બેઠક પાસે આવેલી પાલવ હોટલના રૂમ નંબર-213માં નકલી નોટ છાપવાની કામગીરી ચાલી રહી છે. બાતમીના આધારે સરદારનગર પોલીસની ટીમે પાલવ હોટલના રૂમ નંબર-213માં દરોડા પાડ્યા હતા, જેમાં તેમને 20 વર્ષીય સંજય શ્યામલાલ શર્મા (રહે. રાધિકા ટેનામેન્ટ, નરોડા)ની અટકાયત કરી હતી. સંજય શર્મા પાસે એક પ્રિન્ટર હતું, જેમાં તે ચલણી નોટ પ્રિન્ટ કરી રહ્યો હતો. સંજય શર્મા પાસેથી 500ના દરની 70 અને 100ના દરની ચાર ચલણી નોટ મળી આવી હતી. પોલીસે સંજય શર્માની ધરપકડ કરીને પૂછપરછ કરતાં તેણે કબૂલાત કરી હતી કે નકલી ચલણી નોટ તે જયદીપ સોલંકી (રહે. વાઇબ્રન્ટ ફ્લેટ, નરોડા) તેમજ ભરત ચાવડા (રહે. રાઘવ રેસિડન્સી, નરોડા) સાથે મળીને છાપી રહ્યો છે. 

આરોપીઓની ધરપકડ કરીને 13.6 લાખ રૂપિયાનો મુદ્દામાલ જપ્ત કર્યો
પોલીસે જયદીપ સોલંકીને પકડવાનો પ્લાન બનાવી લીધો હતો તે સમયે બ્લેક કલરની ક્રેટા કાર લઈને જયદીપ આવી ચઢ્યો હતો, જ્યાં તેને કોર્ડન કરીને ઝડપી પાડ્યો હતો. જયદીપની ધરપકડ બાદ તેની પણ પૂછપરછ કરી હતી, જ્યાં તેણે ભરત ચાવડા પાસે વધુ નકલી નોટ હોવાની કબૂલાત કરી હતી. ભરત ચાવડાને પકડવા માટે સરદારનગર પોલીસે એક્શન પ્લાન બનાવી દીધો હતો અને જયદીપ પાસે ફોન કરાવ્યો હતો. જયદીપે ભરત ચાવડાને ફોન કર્યો હતો, જેથી તેણે હંસપુરા ખાતે આવેલા ‌બિઝનેસ હબ બિલ્ડિંગ પાસે હોવાની કબૂલાત કરી હતી. પોલીસની એક ટીમ ક્રેટા કારમાં બેસી ગઈ હતી, જ્યારે બીજા કર્મચારીઓ ખાનગી વિહિકલ લઈને હંસપુરા ખાતે પહોંચી ગયા હતા. પોલીસે ભરત ચાવડાની ધરપકડ કરી લીધી હતી અને તેની પાસેથી 500 દરની પપ અને 100ના દરની 42 નકલી ચલણી નોટ જપ્ત કરી હતી. નકલી ચલણી નોટ છાપીને બજારમાં વટાવવા માટેનો પ્લાન હતો. સરદારનગર પોલીસે તમામ આરોપીઓની ધરપકડ કરીને 13.6 લાખ રૂપિયાનો મુદ્દામાલ જપ્ત કર્યો છે.