દુઃખદ સમાચાર / 29 વર્ષની ફેમસ અભિનેત્રીનું અકસ્માતમાં નિધન, ફિલ્મ ઈન્ડસ્ટ્રીમાં શોકની લહેર, ફેન્સ આઘાતમાં

• બંગાળી ટીવી ઈન્ડસ્ટ્રીની અભિનેત્રી સુચન્દ્રા દાસગુપ્તાનું નિધન
• અભિનેત્રી સુચન્દ્રા દાસગુપ્તાનું માર્ગ અકસ્માતમાં નિધન થયું 
• અભિનેત્રીના અવસાનથી તેના પરિવારજનોને ભારે આઘાતમાં
• અભિનેત્રીના મૃત્યુના સમાચારથી તેના ચાહકો પણ દુઃખી થયા

બંગાળી મનોરંજન ઉદ્યોગમાંથી એક દુઃખદ સમાચાર સામે આવી રહ્યા છે. બંગાળી ટીવી ઈન્ડસ્ટ્રીની જાણીતી અભિનેત્રી સુચન્દ્રા દાસગુપ્તા નથી રહ્યા. અભિનેત્રી સુચન્દ્રા દાસગુપ્તાનું માર્ગ અકસ્માતમાં નિધન થયું છે. અભિનેત્રીના અવસાનથી તેના પરિવારજનોને ભારે આઘાત લાગ્યો છે. અભિનેત્રીના મૃત્યુના સમાચારથી તેના ચાહકો પણ દુઃખી છે.

રોડ અકસ્માતમાં નિધન

મળતી માહિતી મુજબ, સુચન્દ્રા શનિવારે રાત્રે શૂટિંગમાંથી ઘરે પરત ફરી રહી હતી. તેણે ઘરે પાછા આવવા માટે એપ દ્વારા બાઇક બુક કરાવી હતી. પરંતુ રસ્તામાં સાયકલ સવાર એક વ્યક્તિ રોડ ક્રોસ કરી રહ્યો હતો, જે અચાનક વચ્ચે આવી ગયો. બાઇક ચાલકે અચાનક બ્રેક લગાવતાં પાછળથી એક લારીએ બાઇકને ટક્કર મારી હતી. ટક્કર બાદ 29 વર્ષીય અભિનેત્રી સુચન્દ્રા બાઇક પરથી નીચે પડી ગઇ હતી અને પાછળથી આવી રહેલા ટ્રકે તેને અડફેટે લીધી હતી. અભિનેત્રીનું ઘટનાસ્થળે જ મોત થયું હતું. આ ઘટનાથી વિસ્તારમાં શોકનો માહોલ સર્જાયો હતો. થોડા સમય માટે વાહનોની અવરજવર પણ ખોરવાઈ ગઈ હતી.

પોલીસે ટ્રક ચાલકને ઝડપી પાડ્યો

બાદમાં બારાનગર પોલીસ અકસ્માત સ્થળ પર પહોંચી અને પરિસ્થિતિને સામાન્ય બનાવી. પોલીસે ટ્રક કબજે કરી ટ્રક ચાલકને પણ કસ્ટડીમાં લીધો છે. અભિનેત્રીના નિધનથી બંગાળી ફિલ્મ જગતમાં ઘેરા શોકની લાગણી ફેલાઈ છે.

કોણ હતા સુચન્દ્રા દાસગુપ્તા?

સુચન્દ્રા દાસગુપ્તા બંગાળી ટીવી ઈન્ડસ્ટ્રીની જાણીતી અભિનેત્રીઓમાંની એક હતી. તેણે ઘણા પ્રખ્યાત બંગાળી ટેલિવિઝન શોમાં કામ કર્યું. તેણે 'ગૌરી'માં સહાયક ભૂમિકા ભજવીને ઘણી લોકપ્રિયતા મેળવી હતી. અભિનેત્રીની મોટી ફેન ફોલોઈંગ હતી. તેમની અચાનક વિદાયથી ચાહકો ખૂબ જ દુઃખી છે અને ભીની આંખો સાથે તેમને મિસ કરી રહ્યા છે.