2019ની લોકસભાની ચૂંટણીમાં ભાજપની ટિકિટ પર લડશે ધોની-ગંભીર: રિપોર્ટ

2019ની લોકસભાની ચૂંટણીમાં ભલે હજુ થોડો સમય બાકી હોય પરંતુ રાજકીય પક્ષોએ ચૂંટણી માટેની તૈયારી શરૂ કરી દીધી છે. સમાચાર મળી રહ્યા છે કે ટીમ ઇન્ડિયા ઓપનર ગૌતમ ગંભીર ભાજપમાં જોડાઈને પોતાના શહેર દિલ્હીની કોઈ એક  લોકસભા સીટ પરથી ચૂંટણી લડી શકે છે. જોકે આ લીસ્ટમાં વધુ એક નામ જોડાઇ રહ્યુ છે તે બીજા કોઇનું નહી પરંતુ ટીમ ઇન્ડિયાના પૂર્વ કેપ્ટન મહેન્દ્ર સિંહ ધોનીનું છે. 

રિપોર્ટ અનુસાર ભાજપ ધોનીના સતત સંપર્કમાં છે અને તે ઝારખંડમાંથી ચૂંટણી લડી શકે તેમ છે.  આ રિપોર્ટ અનુસાર ભાજપ આ બંને ક્રિકેટરોની લોકપ્રિયતાનો લાભ લેવા માગે છે અને દેશભરમાં પ્રચાર માટેની યોજના ઘડી રહ્યા છે. આ બંને ખેલાડીઓનું ક્રિકેટમાં ખૂબ સારું અને અસાધારણ યોગદાન રહ્યું છે. આ ઉપરાંત સમાજના દરેક વર્ગમાં તેની લોકપ્રિયતા છે. 

રિપોર્ટ અનુસાર ભાજપ નવી દિલ્હીની લોકસભા સીટ પરથી મિનાક્ષી લેખીના બદલે ગૌતમ ગંભીરને ટિકિટ આપી શકે છે. પક્ષને એ પણ જાણકારી મળી છે લેખીના કામથી તેમના સંસદીય વિસ્તારના લોકો ખુશ નથી. ગૌતમ ગંભીર માત્ર ક્રિકેટર જ નહી પણ સામાજિક કાર્યોમાં પણ ભાગ લઇ રહ્યો છે. 

ધોની પોતાની કેપ્ટનશીપમાં ભારતને બે વખત વિશ્વકપ અપાવી ચૂક્યો છે. બીજી તરફ ગંભીર પણ આ વિશ્વવિજેતા ટીમનો એક સભ્ય હતો. હાલમાં ગંભીર દિલ્હીની ટીમ તરફથી રમી રહ્યો છે. બે વર્ષ પહેલા ગંભીરે પોતાની છેલ્લી મેચ રમી હતી. તાજેતરમાં જ વિજયહઝારે ટુર્નામેન્ટમાં દિલ્હીની ટીમને ફાઇનલ સુધી પહોંચાડી છે.