હીટવેવ / આફ્રિકાના ગરમ પવનોથી દાઝશે યુરોપ : લાખો લોકો પર ખતરો હોવાની ચેતવણી

દુનિયા બીજા દેશોમાં પણ લોકો હવામાનના આકરા મારનો સામનો કરી રહ્યા છે. યુરોપિયન હવામાન વિભાગના વૈજ્ઞાનિકોએ હવે ફ્રાન્સ અને જર્મનીના લોકો માટે જીવલેણ ખતરાની ચેતવણી જારી કરી છે.

યુરોપિયન હવામાન વિભાગના જણાવ્યા અનુસાર, આફ્રિકાના રણના વિસ્તારોમાંથી ઉદ્ભવતા ગરમ પવનોના કારણે આગામી કેટલાક દિવસો સુધી સમગ્ર યુરોપ દાઝશે. આ દરમિયાન યુરોપમાં 47 ડિગ્રી સેલ્સિયસ સુધી તાપમાન પહોંચે તેવું પણ અનુમાન છે. આથી વૈજ્ઞાનિકોએ સમગ્ર વિસ્તારમાં એલર્ટ જારી કરી દીધું છે. લોકોને ગરમ પવનોથી બચવા માટે ખાસ સલાહો આપવામાં આવી છે. વૈજ્ઞાનિકોને ડર છે કે, આ સખત ગરમ પવનોના કારણે પારો અચાનક ઉપર જશે અને લાખો લોકોનો જીવ પણ જોખમમાં મૂકાઈ શકે છે.

FIFA મહિલા વર્લ્ડકપ માટે ખાસ તૈયારીઓ

આ અગાઉ વર્ષ 2003માં પણ યુરોપિયન દેશોને આ પ્રકારની આકરી ગરમીનો સામનો કરવો પડ્યો હતો. હવામાનમાં ઓચિંતી ગરમી ખુબ વધી જવાના કારણે ફ્રાન્સમાં 15 હજાર અને યુરોપમાં 35 હજાર લોકોના મોત થયા હતા. એ વખતે તાપમાન 44.1 ડિગ્રી સેલ્સિયસ સુધી પહોંચી ગયું હતું. આ વખતે FIFAએ ફ્રાન્સમાં ચાલી રહેલા મહિલા ફૂટબોલ વર્લ્ડકપ મેચ દરમિયાન વૉટર બ્રેકની સમયમર્યાદા વધારી દીધી છે. મેચ દરમિયાન ખેલાડીઓ માટે કૂલિંગ બ્રેક પણ રાખવામાં આવશે. તાપમાન બહુ વધી જાય તો મેચ પણ રદ્દ કરવામાં આવશે. 

પહેલી વખત દર્શકોને તેમની સાથે પાણીની બોયલ લઈ જવાની મંજૂરી આપવામાં આવી છે. ઉત્તરીય યુરોપના કેટલાક વિસ્તારોમાં ગરમી સૌથી વધુ પડવાની છે. તેમાં ફ્રાન્સના પેરિસ, લા હાવરે અને નૉર્મેંડી જેવા વિસ્તારો સામેલ છે, જ્યાં મહિલા વર્લ્ડકપ આયોજિત થઈ રહ્યો છે. આથી ત્યાં વિશેષ કાળજી રાખવાના આદેશો આપવામાં આવ્યા છે.

સ્પેનમાં પણ 'રેડ એલર્ટ' જારી

સ્પેનના હવામાન વિભાગના વૈજ્ઞાનિકોએ હવામાનના પલટાને ધ્યાનમાં રાખીને ટ્વીટર પર ઑલ રેડ વેધર વોર્નિંગ મેપ (રેડ એલર્ટ) જારી કર્યું છે. તેમાં જણાવાયું છે કે, સહારાના રણમાંથી ઉદ્ભવતા ગરમ પવનોના કારમે સમગ્ર યુરોપ તેના સૌથી ખરાબ સમયગાળામાંથી પસાર થવા જઈ રહ્યું છે. આ કારણે બ્રિટનમાં પણ લોકોને લગભગ એક સપ્તાહ સુધી ગરમી સહન કરવી પડશે.